ଏକତାର ମନ୍ତ୍ର

ଭାରତ ମାତାର ସନ୍ତାନ ଆମେରେ

ଭିନ୍ନତା ରଖିବା ନାହିଁ

ହିନ୍ଦୁ ମୁସଲିମ ଶିଖ ଖ୍ରୀଷ୍ଟିଆନ

ଭାବିବା ହୃଦୟେ କାହିଁ ?

ଈଶ୍ୱର,ଆଲ୍ଲା,ଯୀଶୁଖ୍ରୀଷ୍ଟ ସିନା

ପ୍ରଭୁଙ୍କର ଭିନ୍ନ ନାମ

ଏକ ତ ଈଶ୍ୱର ପୂଜା ପାଉଛନ୍ତି

ରହି ଭିନ୍ନ ଭିନ୍ନ ଧାମ ।

ଜାତି ଆମ ଏକ ଭାରତୀୟ ବୋଲି

ବିଶ୍ୱରେ ପଡୁଛି ହୁରି

ନିଜ ଭାଇ ପାଇଁ ଈର୍ଷା ରଖ ନାହିଁ

ଅତୀତକୁ ମନେ ସ୍ମରି ।

ବସୁଧା ମାଆର ପାଣି ପବନରେ

ସଭିଙ୍କ ଶରୀର ଗଢ଼ା

ବଞ୍ଚିବା ନିମନ୍ତେ ତା' ଦେହେ ଶୋଭିତ

ଫଳମୂଳ ଆମ ଲୋଡ଼ା ।

ସଭିଙ୍କ ଦେହରେ ସମାନ ରଙ୍ଗର

ରକତ ଝରୁଛି ଯେବେ

କିପରି ଏକତା ହଜୁଛି ମନରୁ

ଭାବିଛ କି କୁହ କେବେ ?

ଏକତାକୁ ଭୂଲି ସ୍ୱାର୍ଥପର ହୋଇ

ପରାଧୀନ ହେଲେ ଆମେ

ସ୍ୱାଧୀନତା ବେଳେ ସଭିଙ୍କ ହୃଦୟ

ଯୋଡ଼ାଥିଲା ଭ୍ରାତୃପ୍ରେମେ ।

ମହାପୁରୁଷଙ୍କ ଜୀବନ କାହାଣୀ

ପଢିଲେ ପାରିବ ଜାଣି

ଜାତିଭେଦ ଭୂଲି ସେବା କରୁଥିଲେ

ସଭିଙ୍କୁ ଆପଣା ମଣି ।

ସେହି ପୂର୍ବଜଙ୍କ ବଂଶଧର ସର୍ବେ

ଶପଥ ନେବାରେ ମିଶି

ଏକତାର ମନ୍ତ୍ର ଗାଉଥିବା ସଦା

ନିର୍ମଳ ମନରେ ହସି ।