Library
Profile
ଏକାକୀ ଜୀବନେ
ଏକାକୀ ଜୀବନେ
ମନ ନେଇ ଗଲ ଚାଲି
ପ୍ରେମକୁ ମୋ ଦେଇ ଠେଲି
ଛାଡ଼ି ଗଲ ମୋତେ ଏଇ
ସ୍ମୃତି ଝାଉଁ ବଣେ
ରହୁ ରହୁ ରହି ଗଲି ଏକାକୀ ଜୀବନେ ।
ବଢ଼ି ଗଲା ଆୟୁ ଜାଣ
ଝଡ଼ି ଗଲା ଯଉବନ
ମଉଳି ଗଲା ବି ଫୁଲ
ବିଦଗ୍ଧ ଫଗୁଣେ
ରହୁ ରହୁ ରହି ଗଲି ଏକାକୀ ଜୀବନେ ।
ତମେ ଯେବେ ଗଲ ଭୁଲି
ସ୍ମୃତି ସବୁ ପୋଛି ଦେଲି
ତମେ କିନ୍ତୁ ରହି ଗଲ
ମନ ଉପବନେ
ରହୁ ରହୁ ରହି ଗଲି ଏକାକୀ ଜୀବନେ ।
ତୁମେ ଗଲା ପରେ ପରେ
ପ୍ରୀତି ଆସି ନିତି ଫେରେ
କୋଇଲି ବାହୁନେ
ରହୁ ରହୁ ରହି ଗଲି ଏକାକୀ ଜୀବନେ ।
ଝଙ୍କାଳିଆ ଆମ୍ବ ତୋଟା
ଏବେ ଦିଶେ ଥୁଣ୍ଟା ଥୁଣ୍ଟା
ଭାଙ୍ଗି ଗଲା ଡାଳ କାଳ-
ବୈଶାଖୀ ପବନେ
ରହୁ ରହୁ ରହି ଗଲି ଏକାକୀ ଜୀବନେ ।
ତୁମ ପ୍ରୀତି ରଂଗ ଛିଟା
ବୋଲି ଥ
ିଲ ଦେହ ଗୋଟା
ଛାଡ଼ୁ ନାହିଁ ଯେତେ ଥର
ଧୋଇଲେ ଶ୍ରାବଣେ
ରହୁ ରହୁ ରହି ଗଲି ଏକାକୀ ଜୀବନେ ।
ତୁମ ହାତ ଲେଖା ଚିଠି
ଚୋରି କରି ସହପାଠୀ
ଜିତି ଗଲେ ପ୍ରେମ ପାଠେ
ଗୋପନେ ଗୋପନେ
ରହୁ ରହୁ ରହି ଗଲି ଏକାକୀ ଜୀବନେ ।
ସୀମନ୍ତ ପଡ଼ିଛି ଖାଲି
କେହି କଲେ ନାହିଁ ନାଲି
ଶୁଖୁଛି ହଳଦୀ ଗିନା
ବିବାହ ଲଗନେ
ରହୁ ରହୁ ରହି ଗଲି ଏକାକୀ ଜୀବନେ ।
କେତେ ନିନ୍ଦା ତୁମ ପାଇଁ
ବଞ୍ଚିଛି ମୁଁ ସହି ସହି
ଚିନ୍ତି ନାହିଁ କେବେ ତୁମ
ଅମଙ୍ଗଳ ଦିନେ
ରହୁ ରହୁ ରହି ଗଲି ଏକାକୀ ଜୀବନେ ।
ତୁମ ଛଡ଼ା ଆଉ କେହି
ଆଖିକୁ ବି ଆସି ନାହିଁ
ଆସିବେ ବି ନାହିଁ ଏଇ
କଅଁରା ସପନେ
ରହୁ ରହୁ ରହି ଗଲି ଏକାକୀ ଜୀବନେ ।
