Library
Profile
ଦୁହିତା
ଦୁହିତା
ପୁରାଣରେ ଅଛି କୋଟି ପୂଣ୍ୟ ବଳେ
ପ୍ରାପ୍ତ ହୁଏ କନ୍ୟା ଧନ
ପିତାମାତାଙ୍କର ଜୀବନ ସାର୍ଥକ
ହୁଏ କରି କନ୍ୟାଦାନ |
ଝିଅଟିଏ ଜନ୍ମ ହୋଇ ସ୍ନେହ ପାଇ
ବଢିଥାଏ ବାପଘରେ
ପିତାମାତା ସ୍ନେହ ଗାଆଁ ମାଟି ଛାଡି
ଯାଏ ଦିନେ ଶାଶୁଘରେ |
ସେଥିପାଇଁ ତାକୁ ଦୁହିତା କହନ୍ତି
ହୁଏ ଦୁଇ କୁଳେ ହିତା
ବାପଘର ନାମ ଉଜ୍ଜ୍ୱଳ କରେ ସେ
ଶାଶୁଘରେ ଶୁଭସ୍ମିତା |
ଥିଲା ଦିନେ ଝିଅ ଅତି ଅଲିଅଳି
ପିତାମାତାଙ୍କର ଆଖି
ପରଘରୀ ହୋଇ ହୋଇଯାଏ ବୋହୂ
ମନ ଇତିହାସେ ଲେଖି |
ଗାଆଁ ସାଙ୍ଗସାଥି ଗାଆଁ ବିଲବଣ
ସବୁ ହୋଇଯାଏ ସ୍ମୃତି
ଶାଶୁଘରେ ସ୍ୱାମୀ ଶାଶୁ ଶ୍ୱଶୁରଙ୍କୁ
ନେଇ ରହେ କରି ସାଥି |
ସବୁ ଝିଅ ଭାଗ୍ୟେ ଲେଖା ଏହା ଥାଏ
ଏ ତ ସମାଜର ଵିଧି
କିଏ ରହେ ସୁଖେ କିଏ ବି ସଣ୍ଠଣା
ଭୋଗେ ଶାଶୁଘରେ ନିତି |
ବାହାଘର ପରେ ଲଭି ସେ ସନ୍ତାନ
ହୁଏ ପୂଣ୍ୟବତୀ ମାଆ
ଦୁହିତା ଜନମ ହୁଏ ତା ସାର୍ଥକ
ସାକ୍ଷୀ ତା ଏନ୍ତୁଡ଼ି ନିଆଁ |
ବାପଘର ଆଉ ଶାଶୁ ଘର ପାଇଁ
ହୁଏ ସେ ସମ୍ପର୍କ ଡୋରି
ପ୍ରୀତି ମମତାର ପ୍ରତିମୂର୍ତ୍ତି ଏକ
ଢାଳେ ଜ୍ୟୋତି ଦୀପ ପରି |
