ଦେବାସୁର ଭାବ

     ମରତ ଭୂମିରେ       ରହିଅଛି ପୁରି

            ଦେବ ଅସୁର ସ୍ଵଭାବ

     ଏଇଠି ସରଗ        ଏଇଠି ନରକ

           କିଛି ନାହିଁ ତ ଅଭାବ   ॥

     ଶୁଣିଛି ସରଗେ      ଦେବତା ନିବାସ

           ନରକରେ ପାପୀଜନ

     ଫେଡ଼ିଣ ନୟନ    ଚାହାଁ ପୁନଃ ପୁନଃ

           ପାଇବୁ ଏଠି ସନ୍ଧାନ   ॥

     ଆମରି ସଲିଳେ     ଆମ ସମୀରଣେ

           ଭରିଛି ଐଶୀ ଶକତି

     ଆମରି ମାଟିରେ     ଆମ ବୃକ୍ଷମୂଳେ

           ମିଳେ ପରମ ପ୍ରଶାନ୍ତି   ॥

     ଆମରି ସୁରୁଜ       ଆମରି ଖଣିଜ

          ସଦା ଆମ ଉପକାରୀ

     ଦାତାରୁ ଦେବତା    ଜାଣନ୍ତି ସକଳେ

          ମରତ ନୁହେଁ କି ସରି ?  ॥

     କେତେ ସାଧୁସନ୍ଥ     ଏଇଠି ଜନମି

           ପ୍ରକଟିଛନ୍ତି ଦେବତ୍ଵ

     ଯୀଶୁ ବୃଦ୍ଧଦେବ   ଗାନ୍ଧୀ ଗୋପବନ୍ଧୁ

           ବିଚାର ଧାରା ମହତ୍ଵ   ॥

     ପର ପାଇଁ ଏଠି     ଦାନୀ ହରିଶ୍ଚନ୍ଦ୍ର

           ରାଜ୍ୟକରିଥିଲେ ଦାନ

     ନରରାଣ ଶିବି    ଅଙ୍ଗୁକାଟି ମାଂସ

           ଅପରେ କଲେ ପ୍ରଦାନ  ॥

     ଦେବତ୍ଵର ଭାବ     ପୁରିଛି ମରତେ

         ଅନ୍ୟଦୁଃଖେ ଲୁହ ଝରେ 

     ଭଲ କାର୍ଯ୍ୟକଲେ   ଦେବତ୍ଵ ଆସନ

          ମିଳଇ ଅବନୀ ପରେ  ॥

    ଏ ଭୂମିରେ ପୁଣି  କାମ-କ୍ରୋଧ-ଲୋଭ

           ସ୍ଵାର୍ଥ ଗର୍ବ ଅଂହକାର

    ଜୀବକୁ ଟାଣଇ       ନିମ୍ନକୁ ନିମ୍ନକୁ

          ଦେଖାଏ ନରକ ଦ୍ଵାର ॥

     କଂସ ଦୁର୍ଯ୍ୟୋଧନ  ଲାଡ଼େନ ଗଦ୍ଦାଫି   

          ଅପରକୁ ଦେଲେ ପିଡ଼ା  

     ଅପକ୍ୱ ବୟସେ   ନ ଭୋଗୀ ସଂପଦ

         ଅସମୟେ ହେଲେ ମଢ଼ା ॥

     ଦେବାସୁର ଭାବ     ଏଇଠି ସମ୍ଭବ

         ଆମେତାର ରୂପକାର

    ସ୍ନେହ ପ୍ରେମ ଶାନ୍ତି   ଝରିଲେ ଅନ୍ତରୁ    

         ଏ ହେବ ଅଳକାପୁର   ॥