ଚିତ୍ର ଚରିତ- 30 : ବ୍ୟଙ୍ଗ କବିତା-ସଚେତନ : -ଡକ୍ଟର କୃତ୍ତିବାସ ନାୟକ

ଚିତ୍ର ଚରିତ- 30 : ବ୍ୟଙ୍ଗ କବିତା-ସଚେତନ :

-ଡକ୍ଟର କୃତ୍ତିବାସ ନାୟକ

ସହିବା ଶକତି ବହୁତ ଆମର ଅଭାବ କଷଣ ସହୁ,

କାଦୁଅରେ କିଏ ପଶି ଘାଣ୍ଟିହେବ ଅତି ସହଜରେ କହୁ |

ବିଜୁଳି ନଥିଲେ ପାଣି ନ ଆସିଲେ ଭାଗ୍ୟଦୋଷ ଦେଇ ରହୁ,

ଲାଞ୍ଚୁଆ ବାବୁର ଅତ୍ୟାଚାର ସହି ହାତଗୁଂଜା ଦେଇଦେଉ |

ଭୋଟର ତାଲିକା ଭୁଲଥିଲେ ବି କାମଟା ଚଳେଇ ନେଉ,

ସରକାରୀ ଧନ ଲୁଟୁଥିଲେ କେହି ଆଖିବୁଜି ଚାଲିଯାଉଁ |

ବିପଦ ଆସିଲେ ଲାଙ୍ଗୁଳକୁ ଜାକି ଘରେ ଯାଇ ଲୁଚିରହୁ,

ପରଦୁଃଖ ଦେଖି ନ ଦେଖିଲା ପରି ବାଟଭାଙ୍ଗି ଚାଲିଯାଉ |

କୋଠଧନ କିଏ ଖାଇଗଲେ କହୁଁ ଆମର କି ଯାଏ ଖାଉ,

ପ୍ରତିବାଦ କଲେ କାଳେ କ୍ଷତିହେବ ଗଳାବାଟ ଆମେ ଚାହୁଁ |

ଶିକ୍ଷାର କି ମୂଲ୍ୟ କର୍ତ୍ତବ୍ୟକୁ ଯଦି ଆମେ ସବୁ ଭୁଲିଯାଉ,

ଏମିତି ଚାଲିଲେ ଜାଣିନିଆ ଭାଇ ଆମେ ସଚେତନ ନୋହୁଁ |

000 

24-10-2020