ଚାଲ ଜହ୍ନରେ କରିବା ଘର
ଚାଲ ଜହ୍ନରେ କରିବା ଘର
ଏଇ ! ଶୁଣୁଛ ?
କେମିତି ସେ ମାଡି ଆସୁଛି ଇଆଡ଼େ
କଦମତାଲ କରି,
ପ୍ରସ୍ତୁତ ରହିବାକୁ ପିଟୁଛି ନାଗରା
ଆପଣା ଧୁନରେ ଆପେ
ସ୍ୱର ସଜିଲ କରି l
ହେଇ କାନ ଡେର,
କେମିତି ତା' ପଦଧ୍ୱନି ହେଉଛି
ତୀବ୍ରରୁ ତୀବ୍ରତର,
ପ୍ରତି ପାହୁଣ୍ଡରେ କ୍ଷିପ୍ର ବେଗେ
ବଢୁଛି କମ୍ପନ ଛାତିର l
କୁହନା,
ଅଛି କି କେଉଁଠି
ନିରାପଦ ନିବାସଟେ
ଦଣ୍ଡେ ମୁଣ୍ଡ ଗୁଞ୍ଜିବାକୁ,
ଅଧୁରା ଆହୁରି ଅନେକ କାମ ଅଛି
ଜିଁ ରହି ପୂରା କରିବାକୁ l
ଏଇ ! ତୁମେ ଏତେ
ନିରବ କାହିଁକି ଯେ ?
ପାରିବାର ହୋଇଲାଣି ଆମ ମୁନା,
ମଙ୍ଗଳରେ ଜାଗା କିଣିବାକୁ
ଦେଲାଣି ବଇନା l
ତୁମେ ତାକୁ ଟିକେ ବୁଝାନ୍ତନି
ମଙ୍ଗଳ ତ ଆମଠୁଁ ଅନେକ ଦୂର,
ସେଇଠି ନହେଲା ନାହିଁ
ଆମ ଆଖି ସାମ୍ନାରେ ଏଇଠି
ଜହ୍ନରେ ଗୋଟେ କରନ୍ତେ ଘର l