ବର୍ଷାର ଛଟା

ଝରକା ଆରପଟେ 

      ବରଷା ଛିଟା

ଅସରାଏ ନୃତ୍ୟ ଛନ୍ଦାୟିତ

       ଗୁଳ୍ମଗୁଳି ଦାନଵ 

       ସରପଟିଆ ଓଦା

କେଇ ଘଣ୍ଟା ପାଇଁ ପରାଜିତ ।

ଅତ୍ୟାଚାରିତ ଦୁବ

        ଦାରୁ ପଲ୍ଲବ

ଝୁମୁଥାନ୍ତି ଆନନ୍ଦ ମଲ୍ହାରେ

      କାଣିଚାଏ

      ହସ-ଖୁସିର ଦ୍ୟୁତକ

ଝପାଏ ବର୍ଷା ବିତାନରେ ।

ବାହୁ ଦୁଇ ସ୍ଵତଃ 

        ପ୍ରସାରିତ ମୋର

ବାତାୟନ ଅଳିନ୍ଦ ସେପଟେ

     ଛୁଇଁବାକୁ ସ୍ଵତଃସ୍ଫୁର୍ତ୍ତ 

      ଖୁସିଉତ୍ସ ଧାର

ସାମିଲ ହେବାକୁ ସନ୍ନିକଟେ ।

 ସିହରଣ ସିତ୍କାରର

       ଛଟା ଅଂଗେ ଅଂଗେ ଧାଏଁ

ବିଦ୍ୟୁତ ତରଙ୍ଗ ସମ ଝଲକାଏ

 ଚାରିଦିନର ବିଜୁଳି

     କାଟ ବିଭ୍ରାଟ

ଅସହ୍ୟ ପାଣିପାଗ ଝାଳେଇଦିଏ ।

ଗୁଳୁଗୁଳି ରାକ୍ଷସର

      ଲେଲିହାନ ବିତ୍ପାତ

ଜନ ଜୀବନ ଡାକେ ତ୍ରାହି ତ୍ରାହି

     ଝାଳରେ ଆପ୍ଳୁତ 

     ବୃଦ୍ଧ ବୃଦ୍ଧା ବାଳକ

ଗାଳି ବର୍ଷାନ୍ତି ପାଳିରେ ରହି ।

ବଡ଼ ଅଲାଜୁକ ଏ 

       ଗୁଳୁଗୁଳି ତାତି

ତତଲା କପାଳ- ତାୱାରେ

      ଫୁଟାଏ ସ୍ୱେଦ 

       କାକଳୀ ନିଇତି

ବେତ୍ରାଘାତ ମୁର୍ଚ୍ଛନାରେ ।

ତମେ ହିଁ ସୃଜନା- ସର୍ଜନା - ସମ୍ଭାବନା

     ପ୍ରାଣୀ- ପାଦପ ଜଗତର 

ସପ୍ତାହାନ୍ତେ ଆସନ୍ତ 

      ଯଦି ଝୁମି ଝୁମି 

ଖୁସି ବର୍ଷା ପାଲିଙ୍କିରେ ।

ଅସରାଏ ବୁନ୍ଦା ବୁନ୍ଦି

       ଘର ଅଗଣା 

ବଗିଚା କ୍ଷେତ ତୋଟା ଆଡ଼େ

     ତୃଷିତ ସନ୍ତାପିତ 

    ପ୍ରାଣେ ସଂଜିବନି 

କଳିକା ଫୁଟାନ୍ତ

ଅଫୁରନ୍ତ ଉଲ୍ଲାଷ କଡ଼େ କଡ଼େ ।