ଭଲା ଫାଇଲିନି ଭଲା

   

   ଭଲା ଫାଇଲିନି ଭଲା

   ଶୁଭ ଶରତକୁ ଅଶୁଭ କରିସେ

   ପୂଜାକୁ ଉଜାଡି ଦେଲା

   ଭଲା ଫାଇଲିନି ଭଲା !

   ବରଷକେ ଥରେ ଆସିଥିଲେ ମାଆ

   ଖୁସିର ପସରା ନେଇ

   ଗାଁ ଠୁ ସହର ଉତ୍ସବ ମୁଖର

   ପବିତ୍ର ଦଶରା ପାଇଁ ।

   ସପ୍ତମୀରେ ମାଆ ହେଲେ ଆବାହନ

   ଚମକିଲା ସାଜସଜ୍ଜା

   ମହାଅଷ୍ଟମୀରେ ବ୍ରତରଖି ଭକ୍ତ

   କରିଲେ ମାଆଙ୍କ ପୁଜା ।

  ନବମୀ ସକାଳୁ ଫାଇଲିନି ଆସି

  ରଚିଲା ତାଣ୍ଡବଲୀଳା

  ମୂଷଳ ଧାରାରେ ବରଷା ସାଙ୍ଗକୁ

  ତୋଫାନ ର କିଳିକିଳା ।

  ପୂଜା ବଜାରର ସାଜସଜ୍ଜା ସବୁ

  ମାଟିରେତ ଗଲା ମିଶି

  ଫୁଲ ବେଲପତ୍ର ଧୂପଦାନୀ ଦୀପ

   ବରଷାରେ ଗଲା ଭାଷି ।

   ରଙ୍ଗବେରଙ୍ଗର ଆଲୁଅ ରୋଷଣୀ

   ହସୁଥିଲା ଚଉଦିଗ

   ଫାଇଲିନ୍ ଝଡ ବରଷା ମାଡରେ

   ଧୋଇଗଲା ସବୁ ରଙ୍ଗ ।

  ଉଠା ଦୋକାନୀଙ୍କ ନିଦ ହଜିଗଲା

  ବେପାର ଉଜୁଡି ଗଲା

  ଦଶରା ବଜାର ଆଶାତ ହଜାର

  ଆଶାରେ ମିଳେଇ ଗଲା ।

 ମାଆତ ଭାଷିଲେ ବରଷା ପାଣିରେ

 ନା'କୁ ଭଷାଣୀ ହେଲା

 ବରଷକ ଆଶା ଫାଇଲିନ୍ ଆସି

 ନିମିଶେ ଭଷାଇ ନେଲା ।

ଭଲା ଫାଇଲିନି ଭଲା

ଭଲା ଫାଇଲିନି ଭଲା ।