ଭକ୍ତିପୁଷ୍ପ-୨୭

ଦଳ ଦଳ ଦଳ

ଗୋରୁ ବତ୍ସା ପଲ

କହ୍ନେଇ ଗୋଠକୁ ସହୀ ଗଲେଣି ,

କଳ କଳ କଳ

ଯମୁନାର ଜଳ

ଆସ ଯିବା ରାତି ପାହି ଗଲାଣି ।

ଢଳ ଢଳ ଢଳ

ନୟନ ଯୁଗଳ

ଖସି ପଡ଼ିବକି ସଖି ଗଣ୍ଡରେ ,

ବଲ ବଲ ଥୋକେ

ଚାହୁଁଛନ୍ତି ଲୋକେ

ଥଟ୍ଟା କରିବାକୁ ଗୋପ ଦାଣ୍ଡରେ ।

ଟଳମଳ ପାଦ

ଶୁଣି ଅପବାଦ 

ଫେରିବାର ବେଳେ ସହୀ ଚଞ୍ଚଳୀ ,

ଟଳଟଳ ମନ

ମଉନେ କମ୍ପନ

କଳସୀରୁ ପାଣି ପଡ଼େ ଉଛୁଳି ।

ହଳହଳ ଗୋପୀ

ଯାନ୍ତି ମାପି ଚୁପି

କାହ୍ନୁରେ ସରାଗ ନାହିଁ ଯେପରି ,

ଠୁଳ ଠୁଳ ହେଇ

ବୁଲି ଦେଖୁ ଥାଇ

ଆସୁଛି କି ନାହିଁ ରାଈ ଚତୁରୀ ।

ଛଳଛଳ ଆଖି

ଏକା କାହ୍ନୁ ଦେଖି

ଗୋପ ଆକାଶରେ ଲାଗେ ପରାଗ ,

ଚଳ ଚଳ ଚଳ

ଚଞ୍ଚଳ ଚଞ୍ଚଳ

ବିଳମ୍ବରେ ମରି ଯିବ ସରାଗ ।