ଭିଟାମାଟି ଆମବଇକୁଣ୍ଠ ଧାମ

    

      

       ଓଡ଼ିଆରେ ଆମେ ଓଡ଼ିଆ

       ଘର ହେଉପଛେ କୁଡିଆ

       ଭିଟାମାଟି ଆମ ବଇକୁଣ୍ଠ ଧାମ

        ଆମ ପାଇଁ ଭାରି ବଢିଆ

       ଗରବ ଆମର ପୁରୀ କୋଣାରକ

       ବାରବାଟୀ କିଲ୍ଲା ପଡିଆ

       ଆମେ ଓଡ଼ିଆ ।

       ଝାଟିମାଟି ତାଳତାଟି

       ନଡାକୁଟା ଛପର

       ମନଲୋଭା ଗାଁଗଣ୍ଡା

        ମନଜିଣା ସହର

       ଭଲଲାଗେ ମଠ ଆଉ ମନ୍ଦିର ରେ

      ଘଣ୍ଟ ଘଣ୍ଟା ହେଲେ ବାଡିଆ

       ଆମେ ଓଡ଼ିଆ ।

      ଆମ ପିଠା ଆମ ମିଠା

      କ୍ଷୀରି ପୁଳି କାକରା

      ରସଗୋଲା ଡାଲମାତ

      ସବୁଠାରୁ ନିଆରା

       ବଢାଅନ୍ତି ହାତ ଆମ ଠାକୁରତ

      ଭକତ ଜାଚିଲେ ନଡ଼ିଆ

      ଆମେ ଓଡ଼ିଆ ।

     ଆମ ପାଟ ଆମ ମଠା

     ଝୋଟି ଚିତା ଚମକ

      ତାରକସୀ କାମ ପାଇଁ

      ଖ୍ୟାତ ଆମ କଟକ

     ଆମ ନାଚ ଆମ ମନଛୁଆଁ ଗୀତ

     ଦୁନିଆକୁ ଲାଗେ ବଢିଆ

     ଆମେ ଓଡ଼ିଆ ।

      ଭରା ନଈ ବେଳାଭୂଇଁ

      ନଦନଦୀ ପ୍ରପାତ

      ଘାଟ ଘାଟି କ୍ଷେତ ମାଟି

      ବଣ ବିଲ ପର୍ବତ

      ମନ କିଣିନିଏ ମେଘୁଆ ଆକାଶ

      କଇଁଫୁଲେ ଭରା ଗଡିଆ

       ଆମେ ଓଡ଼ିଆ ।