ଲାଇବ୍ରେରୀ
ପ୍ରୋଫାଇଲ୍
ଭାର ଉତ୍ତୋଳନ
ଭାର ଉତ୍ତୋଳନ
1 min
209
ଜୀବନଟା ସାରା ଭାର ଉତ୍ତୋଳନ
ମଣିଷକୁ କରେ ଭାରି ଅସ୍ଥିର
ମନ ସ୍ଥିର କରି କାମ କରେ ଯିଏ
ଭାର ବୋହିବାକୁ ଲାଗେନି ଡର
ବାଳୁତ କାଳରେ ପାଠପଢା ଭାର
ଚପଳମତିଙ୍କୁ ଡରାଏ ଭାରି
ମନଦେଇ ଯିଏ ପାଠ ପଢେ ସିଏ
ଜୀବନରେ କାହିଁ ଯାଏନି ହାରି
କିଶୋର ଜୀବନ ଆଦ୍ୟ ଯଉବନ
ବୟସ ଲାଗଇ ମନକୁ ଭାରି
ସଂଯମ ଶୃଙ୍ଖଳା ମାନି ନଚାଲିଲେ
ସବୁ ସୁଖ ଯାଏ ଅକାଳେ ସରି
ମୁଣ୍ଡକୁ ତ ଯେବେ ହାତ ପାଇଯାଏ
ନିଇତି ବଢଇ ସଂସାର ଭାର
ସଂସାରି ମଣିଷ ଜଞ୍ଜାଳ ଅଶେଷ
ସମସ୍ୟା ଖିଅକୁ ଲାଗଇ ଡର
ବାପା ମାଆଙ୍କର ସେବା ନକରିଲେ
ଭାରି ହୋଇଯାଏ ପାପର ଭାର
ପାପର ଭାରକୁ ଉଠାଇ ହୁଏନି
ସହି ହୁଏ ନାହିଁ ଯାତନା ତାର
ଜୀବନ ଯାତ୍ରାର ଶେଷ ସୋପାନରେ
ବୟସ କରଇ ସଭିଙ୍କୁ ବାଦ
ଅବସାଦ ଭାର ବୋହି ବୋହି ନିତି
ମନ ସାଥେ ଦେହ କରଇ ଯୁଦ୍ଧ
ଭାର ଉତ୍ତୋଳନ ଲାଗେନି କଠିନ
ବିଭୁପାଦେ ସଦା ରଖିଲେ ମନ
ସବୁ ଭାରକୁ ତ ସହଜେ ଉଠାଇ
ମଣିଷ ଜୀବନ ହୁଅଇ ଧନ୍ୟ ।
