ବାକି ଅଛି ଜୀବନ

କାହିଁକି ଅନ୍ଧକାର ଭଲ ଲାଗେ,

ନୀରବତା ଆପଣାର ଲାଗେ ଜାଣେନା l

ଶବ୍ଦ ସବୁ ଯେତେବେଳେ ଆତ୍ମୀୟର ହୃଦୟ

ନିକଟରେ ବ୍ୟର୍ଥ ପାଲଟି ଯାଏ,

ସେତେବେଳେ ଆପଣାର ଲାଗେ ତ

କେବଳ ନୀରବତା l

ଶୂନ୍ୟତାର ପ୍ରତିଧ୍ୱନିରେ

ଅନୁଭୂତ ହୁଏ

ଏକାନ୍ତରତାର ଆଲିଙ୍ଗନ l

ହୃଦୟର ଧକ୍ ଧକ୍ ଆବାଜ ଖୁବ 

ଜୋରରେ ଶୁଭେ ଯେବେ,

ଅନୁଭବ ହୁଏ ଏବେ ବି ବାକି ଅଛି

ଜୀବନ l

ପ୍ରତାରିତ ନିଷ୍ପେସିତ ଅତୀତର

ଡେଣା କାଟି,

ଇଚ୍ଛା ହୁଏ ବିଗତ କିଛି ମୁହୂର୍ତ୍ତକୁ

ପଙ୍ଗୁ କରିଦେବାକୁ l

ବର୍ତ୍ତମାନ ବକ୍ଷରେ ସଂଜୀବନୀ

ଛିଞ୍ଚି ଇଚ୍ଛା ହୁଏ ପୁଣି

ଜୀଇଁବାକୁ l

ଆଇନା ଆଗରେ ଅଡୁଆ କେଶ ସଜାଡୁ 

ହଠାତ୍ ତେଜି ଉଠେ

ଅତୀତର ପାଉଁଶ ତଳେ ଦିକ୍ ଦିକ୍

ହୋଇ ଜଳୁଥିବା ଆତ୍ମବିଶ୍ବାସର ଲାଲ ଶିଖା l

ତେଜି ଉଠେ ଜୀବନକୁ ସ୍ପର୍ଶ

କରିବାର ଅଜବ ଏକ ଅଭିପ୍ସା l

ସେତେବେଳେ ସମାଧିସ୍ଥ ଅତୀତ ତଳୁ

ଜୀବନ୍ୟାସ ପାଏ ବର୍ତ୍ତମାନ,

ଅତି ସ୍ପଷ୍ଟ ଅନୁଭୂତ ହୁଏ

ହଁ ଏବେବି ବାକି ଅଛି ଜୀବନ l