ଅଟକି ପଡିଛି

ମାନବ ଏଠି ମାଳମାଳ 

ମାନବତା ଖୋଜୁଛି ଜଳେଇ

ଶୁଭ ଦୀପାବଳିର ଦୀପ ତୈଳ

ଆଶାର କିରଣ ନେଇ

ତଥାପି ଖୋଜୁଛି ଖୋଜି ଚାଲିଛି

ମିଳିଯିବେ କାଳେ

 ମହାମାନବ ଅବଶ୍ୟ ସହଳ

ମଣିଷ ଏଠି ଦଳଦଳ

କରୁଣା ସିକ୍ତ ହୃଦୟ ମିଳେନା କେହି

ଯେମିତି ପଡିଛି ମଡକ ଅକାଳ

ତ୍ୟାଗ ବଳିଦାନର ଦ୍ବାହି ଦେଇ

ପ୍ରୟାସ ରହିଛି ଜାରି

ରାସ୍ତା ବ୍ୟବସ୍ଥାର ଅଭିସନ୍ଧି ନେଇ

ସୁମରି ଆଶା ଅଶୁମାରୀ

ସୃଷ୍ଟି ବଦଳିବ ଯଦି

ଦୃଷ୍ଟି ବଦଳିବ

ଦୃଷ୍ଟିକୋଣ ଅବଶ୍ୟ ବଦଳିବ

ହୃଦୟର କୋଣେ ଅନୁକୋଣେ

ଝରି ପଡ଼ୁଥିବ ମାନବତାର ଭଉଁରୀ

ଦେଶ ସ୍ୱାଧୀନ ହେଲା

ପରାଧିନତାର ଶୃଙ୍ଖଳ ଛିଣ୍ଡିଲା

ଲୋକେ ନିଜର ହୋଇ ପାରିଲେ କି ?

ଅଠସ୍ତରୀ ବର୍ଷ ପରେ ବି 

ପରକୁ ଆପଣାର

ଅନ୍ୟକୁ ନିଜର କରି ପାରିଲେ କି ?

ଏଭଳି ପ୍ରଶ୍ନବାଚକ ଚିହ୍ନ ପାଖରେ

ଦେଶପାଇଁ 

ଅଟକି ରହିଛି ଦେଶପ୍ରେମ 

ଏଭଳି ବିରାମ ଚିହ୍ନ ପାଖରେ

ଭାରତ ପାଇଁ 

ଅଟକି ପଡିଛି ଜୀବନ ଲଗାମ

ଏଭଳି ବିସ୍ମୟ ଚିହ୍ନ ପାଖରେ

ଭାରତମାତା ପାଇଁ 

ଅଟକି ଚାହିଁଛି ଶେଷ ରକ୍ତବିନ୍ଦୁ ତମାମ

କହିଲେ ଆପଣେ

କୁଣ୍ଠିତ ଭାବନାର କଳ କଳ ନାଦରେ

କୁତ୍ସିତ କୁତ୍ସା ରଟନାର ଦ୍ବନ୍ଦ ଛନ୍ଦରେ

କିମ୍ଭୁତ କିମ୍ଭାକାର ଛଳ କପଟରେ

ଜୀବନର ବଡ଼ ଦାଣ୍ଡରେ ଦଣ୍ଡାୟମାନ 

ହେଇ ହେବ କି ?

ମାନବତାର ଗେଣ୍ଡମାଳରେ ପରକୁ ଆପଣେଇ ହେବ କି ?

ପଚାରୁଛି ଜନତା ଜନାର୍ଦ୍ଦନ

ଉତ୍ତର ଅବଶ୍ୟ ରଖିବେ

ଗୁଣଗ୍ରାହୀ ସୁଧିଜନ

ଚାହିଁ ରହିଲେ ଦୀନ ହୀନ ଅକିଞ୍ଚନ