ଅଲିଭା ସ୍ମୃତି

ସ୍ମୃତି ତୁମେ... 

ଭଗ୍ନ ମନ୍ଦିରେ ନଗ୍ନ ରୂପର

ବିକୃତ କଳେବର !

ପ୍ରତାରିତ ଏକ ମଣିଷ ଆଖିରୁ

ନିର୍ଗତ ନୀରଝର !!

ସ୍ମୃତି ତୁମେ...

ଶରତ ସକାଳ ଶିଶିର ବୁନ୍ଦାରେ

ମୋତିରଙ୍ଗ ଇନ୍ଦ୍ରଜାଲ ।

ସଜବଗିଚାର ଭିଜା ଗାଲିଚାରେ

ଝରିଥିବା ବାସିଫୁଲ ।।

ସ୍ମୃତି ତୁମେ....

କୁଆଁରୀ ଛାତିରେ ପ୍ରଥମପ୍ରେମର

ସ୍ପନ୍ଦିତ ଦ୍ରୁତ ଆବେଗ ।

ନମ୍ର ଅତୀତର ସୁନ୍ଦରତାପଣ

ଅଭୁଲା ଅଲିଭାଦାଗ ।।

ସ୍ମୃତି ତୁମେ...

ଅସଫଳ ଏକ ପ୍ରେମ କାହାଣୀର

ତୁମେ ଆଦ୍ୟ ତୁମେ ଶେଷ !

ସୁନ୍ଦର ତରୁଣୀ ଥରିଲାଓଠରେ

ତୁମେ ଯେ କୃତ୍ରିମ ହସ !!

ସ୍ମୃତି ତୁମେ...

କୃତ୍ରିମ ହସର ଲାସ୍ୟ ଲହରୀରେ

ପ୍ରାକୃତିକ ଲେପ ଦେଇ ।

ଭରି ଦେଇଥାଅ ସୁଗନ୍ଧ ସୁରଭି

ବର୍ତ୍ତମାନ ରୂପ ନେଇ ।।

ସ୍ମୃତି ତୁମେ...

ଦଦରା ବୀଣାର ଭଙ୍ଗା ରାଗିଣୀରେ

ବିଫଳ ପ୍ରେମର ରାଗ !

ଦୁଃଖଦ ସକାଳ ନିରାଶା ବଦନେ

ରାତ୍ରି ଚୁମ୍ବନର ଦାଗ !!