ଅଜାଙ୍କ ବିଜ୍ଞାନ ପେଡ଼ି
ଅଜାଙ୍କ ବିଜ୍ଞାନ ପେଡ଼ି
ଅଜାଙ୍କ ନିକଟେ ଜମା ହୋଇଲେଣି
ନାତି ନାତୁଣୀ ସକଳ
ଗପ ପେଡ଼ି ଆଜି ଖୋଲିବ ନାଇଁକି
ଉଛୁର ହେଲାଣି ବେଳ ୲୲
ଅଜା ଆରମ୍ଭିଲେ ବିଜ୍ଞାନ କାହାଣୀ
ଅଣୁଜୀବ ଗୁଣ ଗୁଣି
ମନ କର୍ଣ୍ଣ ଦେଇ ଶୁଣିବ ସଭିଏଁ
ଏହା ଯେ ଜ୍ଞାନର ମୁଣି ୲୲
ଜୀବଜଗତରେ ସବୁଠାରୁ କ୍ଷୁଦ୍ର
ଆଖିକୁ ଦେଖା ନଯାଏ
ଅଣୁବୀକ୍ଷଣରେ ଦେଖିହୁଏ ବୋଲି
ଅଣୁଜୀବ ନାମ ବହେ ୲୲
ଚାରି ପ୍ରକାରରେ ଅଣୁଜୀବ ଭରି
ରହିଛନ୍ତି ପୃଥିବୀରେ
ଜୀବାଣୁ, କବକ,ଶୈବାଳ ଇତ୍ୟାଦି
ଆଦିପ୍ରାଣୀ ସହିତରେ ୲୲
ଭୂତାଣୁଟି ଏକ ପ୍ରହେଳିକା ଭଳି
ଜୀବବିଜ୍ଞାନୀଙ୍କ ମତ
ଶରୀର ବାହାରେ ମୃତ ସମ ଥାଏ
ପୋଷକ ମଧ୍ୟେ ଜୀବିତ ୲୲
ନର ଉପକାରୀ ଅଣୁଜୀବ ଏକ
ଲାକ୍ଟୋବାସିଲସ ସେହି
ରସାୟନ କ୍ରିୟା ପ୍ରକ୍ରିୟା ବଳରେ
କ୍ଷୀରକୁ କରଇ ଦହି ୲୲
ଇଷ୍ଟ ସୁରାସାର,ପାଉଁରୁଟି ଭଳି
ଖାଦ୍ୟ ଦ୍ରବ୍ୟ ପ୍ରସ୍ତୁତିରେ
ପେନିସିଲିୟମ ଜୀବଘ୍ନ ରୂପରେ
ଅନେକ ରୋଗକୁ ହରେ ୲୲
ରାଇଜୋବିୟମ ବିବନ୍ଧନ କରେ
ଯବକ୍ଷାରଜାନଟିର
ବସନ୍ତ ରୋଗର ନିରାକରଣରେ
ଅଗ୍ରଗଣ୍ୟ ଯେ "ଜେନର" ୲୲
ସଂକ୍ରାମକ ରୋଗ ସୃଷ୍ଟି କରିଥାଏ
ଯେଉଁ ଗୋଟି ଅଣୁଜୀବ
ବୋଲିଥାନ୍ତି ତାକୁ ବ୍ଯାଧିଜାତକ
ଅପକାରୀ କ୍ଷୁଦ୍ର ଜୀବ ୲୲
ହେପାଟାଇଟିସ ମାଲେରିଆ ପରି
ରୋଗ ଜନମାଏ ଯିଏ
ନିରାକରଣର ପଦକ୍ଷେପ ନେଲେ
ସମୂଳେ ବିନାଶ ଯାଏ ୲୲
ଅଣୁଜୀବ ବାଣୀ ବଖାଣିଣ ଅଜା
ନେବାକୁ ଗଲେ ମେଲାଣି
ନାତି ନାତୁଣୀଏ ବାହୁଡ଼ିଲେ ସର୍ବେ
ମନେ ମନେ ତଥ୍ୟ ଗୁଣି ୲୲