ଆଜନ୍ମ ଭିକାରି

ମାଗଣା ଖାଇବି ମାଗଣା ପିଇବି

ମାଗଣା ଶୋଇବି ମୁହିଁ,

ମାଗଣାରେ ଯଦି ଜହର ମିଳିବ

ଆନନ୍ଦେ ପିଇବି ନେଇ ।     ।। ୧ ।

ପେପର ପ୍ରତ୍ୟହ ମାଗଣା ପଢିବି

ମାଗଣା ଦେଖିବି ଦୂରଦର୍ଶନ ,

ମାଗଣା ପାଣିରେ ଗାଧୋଇଥାଏ ମୁଁ

ମାଗଣାରେ ଦିଏ ଆତ୍ମଜ୍ଞାନ  ।। ୨ ।

ମାଗଣା ଭୋଜିରେ ପହଂଚି ଯାଏ ମୁଁ

ନାଇଁ ମୋତେ ଲାଜ ସରମ,

ବେଭାର ଯଦି ଦେବାକୁ ପଡିବ

ଛୁଟି ନ ମିଳଇ ମୋତେ ଶୁଣ ।। ୩ ।

ଚାକିରୀ ଟଙ୍କା ବ୍ୟାଙ୍କରେ ରଖିବି

ବଦଳି ମାଗିବି ନାଇଁ,

ପୈତୃକ ଘରକୁ ଯାବୁଡି ଧରିବି

ମରାମତି ପଛେ କରେ ନାହିଁ ।। ୪ ।

ମା'ର ପେନସନ ରେ ବିବାହ କରିବି

ମାଗଣାରେ କରେ ହନିମୁନ୍‌,

ମାଗଣାରେ ମୁଁ ବିଦ୍ୟୁତ୍ ଜାଳଇ

ମାଗଣାରେ କରେ ଟେଲିଫୋନ ।। ୫ ।

ବେଡ ରୁମ ମୋର ଭାରି ମୂଲ୍ୟବାନ

କରେନା ମୁଁ କେବେ ବ୍ୟବହାର,

ଅନ୍ୟ କୋଠରୀରେ ଧସେଇ ପଶେ ମୁଁ

ମୋ ସମ୍ପତି ହୁଏନା ଛାରଖାର ।। ୬ ।

ଭାଇର ଦରମା ଖାଇ ମୁଁ ଚଳଇ

ଏହା ମୋର ଅଧିକାର,

ରୋଷେଇ ପରିବା କଥା ମୁଁ ଜାଣେନା

ଘରେ ମୋ ସଭିଏ ଚାକର  ।। ୭ ।

ମା' ର ମୁହଁରେ ତୋରାଣି ମୁନ୍ଦିଏ

ଦେବାକୁ ବଳେନା କେବେ ମନ,

ଭାଇ ଭଉଣୀଙ୍କ କଥା କିଏ ବା ପଚାରେ

ଭାଣିଜୀଙ୍କୁ କରେ ବଦନାମ୍‌  ।। ୮ ।

ସଭିଙ୍କ ଖାଏ ସଭିଙ୍କ ପିଏ ମୁଁ

କରେନା କାହାର ସୁନାମ,

ପଛ କରିଦେଲେ ସଭିଙ୍କ ପାଇଁ

କରେ ତାତ୍ସଲ୍ୟ ଆଉ ଦୁର୍ନାମ ।। ୯ ।

ସମସ୍ତଙ୍କ ଧନ ଖାଇ ମୁଁ ବଂଚିବି

ସେଗୁଡାକ ମାଟି ଗୋଡି,

ମୋ ଧନକୁ ସଦା ସାଇତି ରଖିବି

ସମସ୍ତଙ୍କ ବେକେ ଛୁରୀ ମାରି ।। ୧୦ ।

ପତ୍ନୀ ମୋର ଗୁରୁ ଶାଶୁ ମୋର ପ୍ରଭୁ

ଘର ପାଇଁ ମୋର ନାହିଁ ଦାୟିତ୍ୱ,

ଭାଇ ଭଉଣୀଙ୍କୁ ଲାତ ମୁଁ ମାରଇ

ଶାଶୁ ଘରେ ମୋର ସ୍ଥାୟିତ୍ୱ  ।। ୧୧ ।

ଯିଏ ମଲେ ମରୁ ଯିଏ ସଲେ ସରୁ

ମୋର କିଛି ଯାଏ ଆସେ ନାହିଁ,

ମୋର ପେଟ ପୂରି ସ୍ୱାର୍ଥ ସରିଗଲେ

କାହା ମୁହଁ ମୁଁ ଦେଖେ ନାହିଁ  ।। ୧୨ ।

ଶୁଣରେ ଭାଇନା ଶୁଣରେ ସଙ୍ଗାତ

ଏହା ଏ ଯୁଗର ନିୟମ,

ମୋ ପରି ଯଦି ନକରିବ ତୁମେ

କାନ୍ଦୁଥିବ ନିତିଦିନ    ।। ୧୩ ।