तू थांब जराशी

उभा ठाकला पुढे काळ , तर म्हणेन मी त्यासी

अजुन वेळ आहे मला , तू थांब जराशी

परतून माघारी जिने आणले सत्यवानासी ,

तिनेच तुझ्या सोबत कसे यावे ,सोडून अर्ध्या संसारासी .

आई-बाप सासू-सासरे माझे , माझ्या पाठीशी

थोडे मोठे अजुन होऊदे , माझ्या पिल्लासी .

ना छळीले ना वदले कोणा कडव्या बोलासी ,

अहित कुणाचे कधीच चिंतिले ना मी कधी मानसी,

जमेल तेव्हा नेहमी दिला मी हात मदतीसी .

दैव तरी मग आले का हे माझ्या भोगासी ?

सांग कुणाकडे मागु उत्तर, या माझ्या प्रश्नासी ?

हे परमेश्र्वरा, दाखवी आता, तूच चमत्कारासी .

भावासारखा राहशील उभा ना माझ्या पाठीशी ?

थोडा अवधी अजुन देशील का या तुझ्या बहिणीशी ?

नक्कीच असेल पुण्य एवढे माझ्या पदरासी ,

एकवार तरी मान्य करावे माझ्या विनंतीसी .

नको हक्क मज ना हव्यास कशाचा , नको धनाच्या राशी ,

पार पडू दे माझ्या हातून माझ्या कर्तव्यासी .

हसत हसत मग निरोप धाडीन तुला , मीच एके दिवशी ,

आनंदाने खुशाल ने मग मला तुझ्या सदनासी .

पण , अजुन वेळ आहे मला , तू थांब जराशी !!!

तू थांब जराशी !!!