तुझी नि माझी रेशीमगाठ

मला तुझी नि तुला माझी साथ ,

तुझी नि माझी रेशीमगाठ .

कोण कोठले अनोळखी आपण ,

अचानकपणे कसे भेटलो तरीपण.

काय न उमगे याचे कारण,

ओळखीचे हे अनोळखीपण .

भाव तरळले मनी अकल्पित ,

ओढ दाटली गुढ अनामिक.

स्मित उमटले गोड गाली ,

मंद सुगंधित हवा झाली .

हवेहवेसे नाते आपले ,

हळुवार पणे उमलत गेले .

सरले वाटे आपले शैशव ,

तारुण्याची होता जाणीव .

प्रेमाला मिळाली प्रेमाची साद ,

तुझी नि माझी रेशीमगाठ ।

पूर्ण झाले विवाह बंधन ,

एकच झाले आपले जीवन .

जोडत गेलो नाती गोती ,

मित्र परिवार अन् सखे सोबती .

स्वर्ग सुखाची झाली प्राप्ती ,

आई -बाबा मिळता उक्ती .

दिवसां मागून दिवस सरले ,

नाते आपले बहरत गेले .

मनाची मनाला पटली खूणगाठ , 

तुझी नि माझी रेशीमगाठ .

चिमणी पाखरे जातील दूरवर ,

नसेल तेव्हा जरी कुणी बरोबर ,

आपली राहिल पक्की साथ ,

तुझी नि माझी रेशीमगाठ .

श्वासात राहील जोवर श्वास ,

एकमेकांवर दृढ विश्वास .

मी पंच्चावन्न जरी आणि तु साठ ,

थरथरत्या हातानी घे हाती हात .

मला तुझी नि तुला माझी साथ ,

तुझी नि माझी रेशीमगाठ !!!