पावसा

आला गरजत तू रे

भुई सारी केली ओली

थंडावला जीव माझा

आनंदून पेर केली

पेर केली आनंदून

नाही फुटला अंकुर

लख्ख उन्हात दिसते

काळे कुट्ट रे वावर

आता समजेना कांही

कसे सोडवावे कोडे

कसे आणावे बियाणे

कसे चुकवावे भाडे

जिवापाड जपलेल

खोंड खिल्लार अल्लड

आता विकतो हा जीव

नको करू तू हुल्लड

किती वाट पाहू तुझी

कुठे गेला तू रुसून

ओशाळला जीव माझा

इथं शेतात बसून

ओटी भरून दोनदा

माझी मला येते कीव

हाती निराशेचे पीक

वाटे संपवावा जीव

तूच सांग माय बापा

कधी दुःख हे सरन

तुझ्या एका सरीवरी

माझ जीवन मरण