कशी भागवू भूक या पोटाची

रात्रीचा दिवस करून राबतो

तरी मिळत नाही भाकर कष्टाची

कुणा सांगू व्यथा काळ्या आई

कशी भागवू भूक या पोटाची

तुला हिरवा शालू नेसवताना

पायातून वाहते धार लाल रक्ताची

सजविण्यात तुला कंगाल झालो

कशी भागवू भूक या पोटाची

सुगीच्या दिवसात तुझ्या

नजर वाकडी लहरी ढगाची

बरसून अंग अंग ओरबडते

कशी भागवू भूक या पोटाची

जेव्हा जेव्हा तू बहरतेस

निलामी होते तुझ्या पिकांची

सारं व्यापारी,दलालांच्या घशात

कशी भागवू भूक या पोटाची

उद्योगपती,बिल्डर्स, नेते

साऱ्यांच्याच तू आहे प्रीतीची

टपून बसली गिधाडं सारी

कशी भागवू भूक या पोटाची

आता कायदाच तुला लुटायचा

नियत बहकली मग्रूर सरकारची

डोळ्या देखत तोडणार लचके

कशी भागवू भूक या पोटाची

मोडताहेत अर्थव्यस्थेचा कणा

गरज पुन्हा नव्या कृषिक्रांतीची

भूमीपुत्रच जर संपला इथे तर

कशी भागवाल भूक तुम्ही पोटाची