गेले ते दिवस

गेलेत हो ते दिवस

आलोय मी कुठे ।

परत नाही येणार

दिवस तेच इथे ।

हसणे रडणे खेळणे

दिवसभर भटकणे ।

मोठा मी झालो ना

दिवस होते ते जुने ।

आईचा तो मार

बाबांचा होता धाक ।

भ्यायचो ना किती

ऐकताच ती हाक ।

शाळा असो वा घर

मस्ती करायची खूप ।

वरण भातावर वाढे

आईच जास्त तूप ।

हवे ते मिळायचे

चिंता नव्हती कशाची ।

बाबाही किती झटायचे

नसे काळजी खिशाची ।

पावसात मस्त भिजायचो

उन्हा तान्हात खेळायचो ।

मित्रांसोबत आम्ही तेव्हा

पेरुही कसे चोरायचो ।

सारच संपलं आता

उरल्या फक्त आठवणी ।

किती छान होती ना

आजीची ती कहाणी ।

खूप वाटत मनाला

हवे परत तेच दिवस ।

सांगा ना कोणी मला

करू कुणाला नवस ।