असा एक सूर्यास्त
असा एक सूर्यास्त
हे मावळत्या दिनकरा
थांबशील का रे जरा
पायवाट तुडवीत घाईने
जाईन मी रे माझ्या घरा
अंधारात टपलेले सावज
करतील माझी शिकार
घरट्यातील चिल्लीपिल्ली
शोधतील कोणाचा आधार?
हंबरतील गाई वासरे
कळ्या हिरमुसतील अंगणी
मिणमिणेल सांज दिवाही
दारात तुळशीवृंदावनी
लाल केशरी नभांगण
क्षणात होईल धूसर
उगवशिल तू नव्याने मित्रा
आयुष्यात उठेल माझ्या काहूर
माझा ही राणा असेल दाराशी
ओढ जशी तुला क्षितिजाची
भेसूर होईल सांजवेळ मग
समजूत घालू कशी मी मनाची
भय नाहीच तमाचे मजला,
ढसतात वखवखलेल्या नजरा
अस्तास रवी जातो पण
कित्येक मनात असतो धोसरा
