ಅಪ್ಪ

ಸರಳತೆ ಮಾದರಿ ಜೀವನದ ಸರದಾರ
ಕಷ್ಟಪಟ್ಟು ದುಡಿದು ನಡೆಸಿದ ಸಂಸಾರ 
ತನ್ನವರಿಗಾಗಿ ತನ್ನದೆಲ್ಲ ತ್ಯಾಗ ಮಾಡಿದವ 
ಸಂಸ್ಕಾರ ಜೀವನ ಪಾಠವ ಕಲಿಸಿದವ||

ಅಮ್ಮನ ಪ್ರೀತಿ ಕಾಳಜಿ ಕಂಡಷ್ಟು
ಅಪ್ಪನ ಪ್ರೀತಿ ಮಮತೆ ಆರೈಕೆ ಕಾಣದು 
ಅಪ್ಪನ ಪ್ರೀತಿಗೆ ಬೆಲೆ ಕಟ್ಟಲಾಗದು 
ಅಳೆಯಲಾಗದು ಸಾಕಾರಮೂರ್ತಿಯ ಸಹನೆಯೆಷ್ಟೆಂದು||

ಬದುಕಿಗೆ ಮೊದಲನೇಯ ಗೆಳೆಯನಾಗಿ 
ಜೀವನದ ಉತ್ಸಾಹದ ಚಿಲುಮೆಯಾಗಿ 
ಈ ಬದುಕಿಗೊಂದು ಸ್ಪೂರ್ತಿಯಾಗಿ 
ಸದಾ ರಕ್ಷಿಸಿ ಕಾಯುವ ಸೈನಿಕನಾಗಿ||

ಸದ್ಗುಣ ಸಂಪನ್ನ ನನ್ನ ಅಪ್ಪನು 
ಆಕಾಶದಷ್ಟು ಎತ್ತರ ಪ್ರೀತಿ ಕೊಟ್ಟವನು 
ಲಾಲಿಸುತ ಪಾಲನೆ ಮಾಡಿದವನು 
ಈ ಜೀವನದ ಮಾರ್ಗದರ್ಶಕನು||

ಭೀಮನಷ್ಟೆ ಬಲವಂತನು ಜಗದಲಿ 
ಕರ್ಣನಂತೆ ದಾನಿಯು ಗುಣದಲಿ 
ಅಪ್ಪ ಜೊತೆಯಿದ್ದರೆ ನೂರಾನೆ ಬಲವು 
ಹೆದರಲ್ಲ ಬಂದರೆ ಬೆಟ್ಟದಷ್ಟು ನೋವು||

ಕೇಳಿದನ್ನೆಲ್ಲಾ ಕೊಡುವ ನನ್ನ ಅಪ್ಪ ಸಾಹುಕಾರ 
ಮಕ್ಕಳೆಂದರೆ ಅವನಿಗೆ ಎಲ್ಲಿಲ್ಲದ ಮಮಕಾರ
ಭರವಸೆಯ ಈ ಸೂರಿಗೆ ಆಧಾರ ಸ್ತಂಭವು
ಪ್ರೀತಿಯೊಂದೆ ತಿಳಿದ ಮುಗ್ಧ ಅಪ್ಪನ ಹೃದಯವು||

✍️ರಮ್ಯಕೃಷ್ಣಪ್ರಭು 
ಮೂಡಬಿದಿರೆ