તરબોળ

મન પ્રસન્નતાથી આજ મારું ઊભરાઈ ગયું, 

વતનની બૂ-થી આજ મન તરબોળ થઈ ગયું.

તન ભલે વતન છોડે મન વતનમાં રહી ગયું,

વતનની બૂ-થી આજ મન પ્રફુલ્લિત થઈ ગયું. 

હવા વતનની તાજી ને જીવંત દેખાતી ખુશનુમા,

ને પ્રેમાળ લાગણીઓમાં રમવાનું મન થઈ ગયું,

વતનની બૂ-થી આજ મન તરબોળ થઈ ગયું. 

બાળ ગોઠિયાઓની મંડળી ને વનવગડાનો નૈસર્ગિક આનંદ,

કુદરતને ખોળે આજ મને શ્વાસ લેવાનું મન થઈ ગયું,

વતનની બૂ-થી આજ મન મારું તરબોળ થઈ ગયું. 

ચોમાસાની શરૂઆતે ને વતનની ધરતી પર વરસતાં, 

પહેલાં ફોરાંની આજ મને સુગંધ લેવાનું મન થઈ ગયું,

વતનની બૂ-થી આજ મન તરબોળ થઈ ગયું. 

વતનમાં ખેતરે ને બાગમાં કોયલ ને મોરનાં ટહુકામાં,

પતંગિયા,ભમરાની સંગે મને ગીત ગાવાનું મન થઈ ગયું,

વતનની બૂ-થી આજ મન તરબોળ થઈ ગયું. 

હ્યદય આજ પોકાર કરે મારી આ માતૃભૂમિ કાજે,

આખરી સમય સ્વજનો સાથે વિતાવવાનું મન થઈ ગયું,

વતનની બૂ-થી આજ મન તરબોળ થઈ ગયું.