શાંતિદૂત
શાંતિદૂત
“મમ્મા, બેનને લઈ જા ને"
હરપળ દોડવા માટે તૈયાર રહેતી મા
લોટવાળા હાથ ખંખેરી યુદ્ધસ્થળે જઇ પહોંચી
દ્રશ્ય જ કહાની કહેતું હતું :
ભાઈના લેસન પર આડા અવળા લીટા હતાં
ને બહેનની ફુવારા ચોટલી વેરવિખેર હતી
નુકસાન બન્ને તરફ હતું
છતાં હસી પડી માતાને એ મનહર દ્રશ્ય
મનની મેમરીમાં લોક કર્યું
માતાનાં બન્ને પડખે રોતલ ચહેરે બન્ને બાળ સમાઈ ગયાં
નિપૂણ વિષ્ટિકાર માતા સફેદ ઝંડા સાથે લઈને જ ફરતી:
બન્નેનાં ચહેરા લૂછયાં, ચૂમી લીધાં ને એક એક ચોકલેટ આપી
માતાએ પરત ફરતાં નજર જરા પાછળ ફેરવી,
ભઇલો બહેનને ચોકલેટનું રેપર ખોલી આપીને
બહેનની નાનકડી ચાંચમાં ચોકલેટ મૂકી રહ્યો હતો !
ખડખડાટ હાસ્યધ્વનિ સાથેનું
આ બીજું દ્રશ્ય પણ માતાએ હૃદયની મેમરીમાં લોક કર્યું
સંતોષ હૈયે ભરીને એ ચાલી ભૂલકાં માટે ફુલકાં બનાવવા