હા પસ્તાવો
હા પસ્તાવો
કંઇક અપરાધભાવ
અને કંઇક અફસોસ સાથે
હું મારા મોબાઈલને જોઈ રહું છું
આનાં જ લીધે ? હા,આજ
કોઈ મહામૂલા સમયે જ્ઞાનનો અને
વ્હાલનો દરિયો એવી મારી માતા
મારી બાજુમાં આવી ને બેસી ગઈ હતી
એ બોલકી હતી છતાં
ત્યારે ચૂપચાપ બેસી
મને મોબાઈલમાં વ્યસ્ત જોઈ રહી હતી
મોબાઈલની વહેવારિક લાઈક-
સામે માની મીઠી નજરમાં લાઈક જ લાઈક
ગુલાબનાં ફોટાઓનું ફોર્મલ ફોરવર્ડિંગ-
સામે મઘમઘતો ગુલાબ બાગ
તેનાં સાંનિધ્યની લોક કરવા જેવી
એ ક્ષણો મેં ગુમાવી
કાચનાં કટકા માટે રત્નો ગુમાવ્યા
ક્યાં ગયો એ સમય ? સરકી ગયો
ક્યાં ગયો મોબાઈલ ? આ રહ્યો
ક્યાં ગઈ માતા ? એ જતી રહી
"આપ જેમનો સંપર્ક કરવા ઈચ્છો છો
તે ઉપલબ્ધ નથી"
કેમ, કેમ મેં ત્યારે જ ?
બસ, હવે તો બસ આજથી જ...
"વડીલ ! કહોને, તમારો દિવસ કેવો રહ્યો ?"