રંગ ઘોળ્યો

કેસૂડાંની પાંદડીનો રંગ લાગ્યો આજ પાકકો, 

હૈયાની હાટડીએ રંગ ઘોળ્યો મેં ઘાટ્ટો,

મધરાતે મોહન સંગ ગોપીઓની રાસલીલા,

મેં તો કાલિન્દીને ઘાટે દીપ ધર્યો છે ઝાંખો,

રંગીલા હોઠો પર છલકાતી મુસ્કાન જોઈ,

અંગેઅંગ પર ગુલાલ ખોબો ભરીને ફેંકયો,

કાજળની કાળાશ ફરી વળી છે ઉરમાં ને,

રેલાતી પાંપણે મીઠી ફરિયાદનો તાર છેડયો,

ગોકુળની કુંજ ગલીઓમાં વાલમનો સાદ,

અંતરના આંગણે નવરંગો લઈ આવી ઊભો,

લાગણીની પિચકારી ભરી એ આવે રંગવા,

મેં તો પ્રેમની પ્યાલી ઢોળીને હરપળ રંગ્યો.