લગ્નોત્સુક કન્યાનાં મનોભાવ

એક મજાનો જણ અચાનક આંગણિયામાં આવે, બાપુ પાસે મુજને માગે.. 

એમ જિંદગી જીવવા જેવી લાગે.

પરણીને પગલા દઉં, ને એ બોલે , 'તારે પગલે ઘર તો ભર્યુંભાદર્યું લાગે !'

એમ જિંદગી જીવવા જેવી લાગે.

ઘર-ગૃહસ્થી સાચવવાના કોડ ઘણાંયે મામાટે પૂરીને હું તો ઉભી રહું ઉંબરિયે,

સાસુમા પોંખે ને હરખાતે હૈયે જેઠાણી મારાં ઓવારણા લૈ, લઈ જાયે રાંધણિયે.

ઘરની ધરખમ રૂઢીઓમાં એ હળવેહળવે ઢાળે !

એમ જિંદગી જીવવા જેવી લાગે.

દેરિડો દોસ્તાર સમો થૈ ભાભીભાભી કરતો મારી આગળપાછળ હરખપદુડો ચાલે,

નાની નણદી લાડ કરીને આણામાથી પચરંગી પટ્ટોળા ઉપર ખુદનો દાવો માંડે,

સસરાજી હિંડોળે બેસી શુભાશિષ વરસાવે...

એમ જિંદગી જીવવા જેવી લાગે.

રઢિયાળી રાતે રંગરસિયો રૂંવેરૂંવે રંગે, અધબીડી આંખોને આંખોથી આલિંગે,

ખૂણામાં થરથરતો દિવડો સ્થિર થઈને, પ્રણય તણી મસ્તી દેખીને અંતરમાં આનંદે ,

સઘળા લોકો આમ જીવનને રમણિયતાથી માણે...

એમ જિંદગી જીવવા જેવી લાગે.