હા..હું શિક્ષક છું

વેકેશન ખુલ્યું ને ચિત્ત ચકડોળે ચડ્યું,

આવી ગયો એ ઉત્સાહનો દરિયો,         

જેમાં ડૂબવા હું પળ- પળ તર્યો.

પ્રાર્થનાનાં સૂરો કાનમાં ગુંજતા'તા,

અમે રાત-દિવસ શાળાને ઝંખતા'તા.

આવી ગયો એ સૂરોનો દરિયો,

જેમાં ડૂબવા હું પળ-પળ તર્યો.

વર્ગખંડની મસ્તીમાં મસ્ત બનતાં,

કાગળની કશ્તીએ દુનિયા તરતાં.

આવી ગયો એ મોજીલો દરિયો,

જેમાં ડૂબવા હું પળ-પળ તર્યો.

બ્લેક બોર્ડની આકૃતિએ બ્રહ્માંડ જોતાં, પેન્સિલની અણીએ ભવિષ્ય દોરતાં.

આવી ગયો એ જ્ઞાનનો દરિયો,

જેમાં ડૂબવા હું પળ-પળ તર્યો.

શિક્ષકોની મધુર વાણીમાં ખોવાય જવાતું, લાગણીઓને જોડી એકમેક રોવાય જવાતું. આવી ગયો એ વ્હાલનો દરિયો,

જેમાં ડૂબવા હું પળ-પળ તર્યો.