એક નામ

જન્મતાંની સાથે જન્મતું, એક નામ,

મા બાપનાં નામથી, ઓળખાતું, એક નામ !

બાળપણમાં હસતું રમતું, એક નામ,

મિત્રોની સોબતે ખીલતું, એક નામ !

યૌવનની ડાળે ઝૂલતું, એક નામ,

જીવનસાથીનાં પ્રેમથી મહોરતું, એક નામ !

સંસારરૂપી સાગરમાં સહેલતું, એક નામ,

જવાબદારીઓનાં જોરથી, ઝઝૂમતું એક નામ !

ઉંમરની સાથે વધતું, એક નામ,

અનુભવનાં સાથથી શીખતું, એક નામ !

સંતાનોની પ્રગતિમાં ખુશ થતું, એક નામ,

વનપ્રસ્થાને પ્રવેશતું, એક નામ !

લાકડીનાં ટેકે ચાલતું, એક નામ,

હાથોનાં નેજવે, રાહ જોતું, એક નામ !

બધાંની અપેક્ષાઓને પૂરું કરતું, એક નામ,

અંતે, પરમાત્મામાં, વિલીન થઈ જતું, એ જ નામ,

ને, તસ્વીર બની, યાદોમાં સ્મરાતું, એ જ નામ !