એ પ્રેમ છે

તારું સપનું ઊગ્યું મારી આંખમાં એ પ્રેમ છે...

ના કશું તેં કહ્યું સમજી સાનમાં એ પ્રેમ છે....

વેદના સંતાડવાની ટેવ તારી, છે ખબર

આવ્યું તારું દુઃખ મારા ધ્યાનમાં એ પ્રેમ છે...

માર્ગ તારો સાવ સૂનો, ભેરુ ના કોઈ દિસે

ચાલું પડછાયો બનીને રાહમાં એ પ્રેમ છે...

માંગણી તારી કશી ક્યારેય કોઈ હોય ના

ગમતું ને ના ગમતું મારા ખ્યાલમાં એ પ્રેમ છે...

આવશે સંજોગ કેવા કોણ જાણે કાલના,

પણ નિભાવું સાથ હું હર હાલમાં એ પ્રેમ છે.