છેલ્લા શ્વાસે...

અંતે રસ્તાઓ વિસરાશે,

મંજિલ જાણે દૂર થશે,

કોઈકની આંખ ભીંજાશે,

શમણાઓ ચૂર થશે.

યાદ આવશે લોકો,

ભૂલો યાદ કરવા ક્યાં સમય હશે ?

કેટલી બારીઓ બંધ કરીશું,

જ્યારે બારણે જ પ્રલય હશે ?

હાથ ભલે પકડ્યો હોય,

અંતને કોણ ટાળી શકશે,

રિસાઈને સમય બગાડ્યો,

હવે વચન કોણ પાળી શકશે ?

જેને કંઇક કહેવાનું હતું,

હવે તો કોણ કહી શકશે ?

જેની સાથે રહેવાનું હતું,

હવે એનો વિયોગ કોણ સહી શકશે ?

છેલ્લા શ્વાસ સુધી રાહ જોઈને,

તમને કે મને ફાયદો શું ?

આજની વાત કાલે કહીશ,

એવો વળી કાયદો શું ?

આ વાર્તાના છેલ્લા પાને પહોંચી એક દિવસ,

સમયનાં વહેતા વહેણમાં જ વહી જશું,

આજની અનમોલ પળ જો ખોઈ બેઠાં,

તો છેલ્લા શ્વાસે યાદો પરજ રડતાં રહી જશું !