వలపు మేఘం

వలపుమేఘం కబురుతెస్తే ఈసడించుట న్యాయమేనా 

రాజహంసలు వెంటబడితే కసిరికొట్టుట న్యాయమేనా

మల్లెమాలలు మోసుకొస్తే మూతి తిప్పుట న్యాయమేనా 

వెన్నెలొలికిన రాత్రివేళల జ్వాలరేపుట న్యాయమేనా 

శశిని మించిన మోము చూపవు తీయతీయని మాటలాడవు

నిన్ను చూపే కలను కూడా చిదిమివేయుట న్యాయమేనా  

కనులలో వత్తులను వేస్తూ ఎన్ని వెలిగించాను తెలుసా

సుడిగాలిలా వచ్చేసి దీపములార్పివేయుట న్యాయమేనా 

తెరచుకొని నీవొచ్చినాకే మూసుకోమని వేడుకున్నా 

గుండెతలుపులు తెరవలేదని నిందలేయుట న్యాయమేనా

అంతరంగములోని కోరిక గొంతు విప్పుట నేర్వలేదే  

మనసు తెలిసిన దానివైనా జాగుచేయుట న్యాయమేనా