శివ స్తుతి

శివరాత్రి పర్వదినము...

తపస్వి మనోహరం e-book కొఱకు రచన.

తేది :16-02-2023

1.

దివిజుల్ సేయగ బూజలీ దినమునన్ దీపించ నీ శోభలున్

శివ రాత్రిన్ బలు సేవలన్ జరిపి నిన్ జిత్తంబులో నిల్పి నే

నివసింతున్ బద సన్నిధిన్ బ్రణతితో నిండార కీర్తించుచున్

భవ!కైవల్య పథంబు జూపగదె నా ప్రారబ్ధముల్ ద్రుంచుచున్.//

2.

సురలున్ యోగులు భూత యక్ష గణముల్ స్తోత్రంబులన్ జేయుచున్

వరముల్ గోరుచు నీదు దర్శనము సంప్రాప్తించ తోషంబుగన్ 

బరమాత్మా!యని భక్తితో పొగడి నీ పాదంబులన్ గొల్తురా 

చరితంబంతయు వింటినయ్య!శివ!నీ సాయుజ్యమున్ గోరుచున్.//

3.

వరదా!కావగ రావ!యంచు వినతిన్ బ్రార్థించగా భక్తులున్ 

బరువుల్ బెట్టుచు వచ్చి నిల్తువట నీ వాత్సల్యమున్ జూపుచున్ 

గరళంబీయగ మ్రింగినావట కదా!కారుణ్య వారాశివే!

తరముల్ నిల్చెడి నీదు లీల వినుచో తాపంబులే నాశమౌ //

4.

గిరిజా శంకర!గంగతోడ నభిషేకించంగ నేవేచితిన్

విరులున్ బత్రము లెన్నియో కలిపి సంప్రీతిన్ విభూషించగన్ 

దరువుల్ తప్పెట కాహళా ధ్వనులతో ధామంబుకున్ జేరితిన్

బరమేశా!కనుపించవయ్య!ముదముగా భక్త్త్యాత్మనై కొల్చెదన్ //

--------------------------