నీ తలపు గగనాలు

నీ మనసు పాడుకొను..పద్యమై పోతాను..! 

నా ప్రేమ ప్రకటించు..కావ్యమై పోతాను..! 

పగడాల పెదవింట..జగడాలు మధురమే.. 

నీ చూపు పండించు..రాగమై పోతాను..! 

ఏ ఉలికి అందునో..అపురూప భంగిమలు.. 

ఎనలేని భావాల..శిల్పమై పోతాను..! 

వెన్నెలకు వేడుకే..విరహాల రగిలించ.. 

నీ వేదనను తీర్చు..గంధమై పోతాను..! 

వేదాంత సారమే..వర్షించు ప్రేయసీ.. 

నీ పాద మంజీర..నాదమై పోతాను..! 

కనులతో కథలనే..చెప్పేవు చెప్పకే.. 

నీ తలపు గగనాల..మేఘమై పోతాను..!