బ్రతుకు చాలు

భ్రమావరణ గంధానికి..బానిసలా బ్రతుకుచాలు..! 

రాలుపూల హాసానికి..ఊయలలా బ్రతుకుచాలు..! 

ఆగక కురిసే నిప్పుల..పాఠమెంత మనోహరం.. 

ఈ వసంత గ్రీష్మానికి..కోవెలలా బ్రతుకుచాలు..! 

అల్లుకున్న వినోదాల..హరివిల్లుల సందడిదే.. 

వసంతాల వేదానికి..కోకిలలా బ్రతుకుచాలు..! 

మంత్రించే చూపులతో..వెంట తిప్పుకున్నావుగ.. 

తిరుగులేని విరహానికి..గీతికలా బ్రతుకుచాలు..! 

మతిమరుపు హితవరియని..తెలిసి మరువలేనేమిటి.. 

నవ్వుతున్న మోహానికి..నవలికలా బ్రతుకుచాలు..! 

పడిపోయిన పీటముడిని..గమనించుట హాయేలే.. 

వ్రాసుకున్న కథనానికి..వాహికలా బ్రతుకుచాలు..!