భ్రమ అని తెలుసు

భ్రమ అని తెలుసు భ్రమ అని తెలుసు
బతుకంత క్షణకాల స్వప్నమని తెలుసు
మాయ అని తెలుసు మాయ అని తెలుసు
మనిషి వేసుకున్న వేషమని తెలుసు
తెలిసి తెలియని దారుల వెంట
తిరుగుతావెందుకు మనసా
నీతో రానిది నీదని భావించి
తపన పడతావెందుకు మనసా
నిన్నటి నవ్వులు నేడు ఎక్కడా
నేటి కన్నీళ్లు రేపటిదాకా
కాలం చేతిలో కరిగే మంచులా
కథ ముగిసిపోదా కనురెప్పపాటున
కట్టిన మేడలు కలిసిపోవును
దాచిన ధనము దూరమవుతుంది
చేసిన మంచే తోడుగా నడిచి
చివరి దారిలో దీపమవుతుంది
భ్రమ అని తెలుసు భ్రమ అని తెలుసు
బతుకంత క్షణకాల స్వప్నమని తెలుసు
మాయ అని తెలుసు మాయ అని తెలుసు
మనిషి వేసుకున్న వేషమని తెలుసు

నీదని చెప్పే ఈ దేహమైనా
నీ మాట వింటూ నిలిచేనా
ఊపిరి దారము తెగిపోయాక
ఒక్క అడుగైనా కదిలేనా
కోపమెందుకు పగలెందుకు
కూలే గోడలపై గుర్తులెందుకు
ప్రేమను పంచే హృదయముంటే
పరమాత్మ నీలో కనిపించడా
భ్రమ అని తెలుసు భ్రమ అని తెలుసు
బతుకంత క్షణకాల స్వప్నమని తెలుసు
మాయ అని తెలుసు మాయ అని తెలుసు
మనిషి వేసుకున్న వేషమని తెలుసు

మట్టిలో పుట్టిన మట్టి బొమ్మకు
మమకారమెందుకు ఓ మనసా
వచ్చిన దారినే వెళ్లే వేళలో
వెంట తీసుకెళ్లేది ఏమున్నదా
పేరు ప్రతిష్టలు నీటి రాతలు
పదవి వైభవం గాలి దీపాలు
దయతో పలికిన ఒక్క మాటయే
కాలం చెరపని శాశ్వత గీతం
దేవుడు ఎక్కడో వెతకకు మనసా
దీనుని కన్నీటిలో చూడవా
గుడిలో వెలిగే జ్యోతి కంటే
గుండెలో మంచిని వెలిగించవా
భ్రమ అని తెలుసు భ్రమ అని తెలుసు
బతుకంత క్షణకాల స్వప్నమని తెలుసు
మాయ అని తెలుసు మాయ అని తెలుసు
మనిషి వేసుకున్న వేషమని తెలుసు

ఆకలిగొన్న వాడికి అన్నమై
అలసిన ప్రాణికి నీడవై
అహములు విడిచి ప్రేమగా మారితే
అదియే మోక్షపు తొలి అడుగురా
కన్నులు మూస్తే చీకటి కాదు
లోపలి వెలుగులు చూడాలి
నేను నాదనే తెరను తొలగించి
అంతటా ఉన్నది ఒకటని తెలియాలి
ఆడే బొమ్మవు ఆడించేవాడు
నీ అంతరంగాన కొలువున్నాడు
ఆ నిజమెరిగిన మరుక్షణమే
మాయల బంధం కరిగిపోతుంది

భ్రమ అని తెలుసు భ్రమ అని తెలుసు
బతుకంత క్షణకాల స్వప్నమని తెలుసు
ధర్మమే చివరకు మిగులునని తెలుసు
ప్రేమే పరమాత్మ రూపమని తెలుసు
తెలిసిన నిజాన్ని ఆచరించగలిగితే
జన్మకు అర్థం దొరుకునులే మనసా