ସବୁଜ ବିପ୍ଳବ

ଧରଣୀକୁ ଆମ ମାଆ ବୋଲି କହି

ଚାଲିଚେ ବିବସ୍ତ୍ରା କରି

ସବୁଜ ଓଢଣୀ ଟାଣି ଦେଇ ପୁଣି

ଦେଇଚେ ଆତ୍ମାକୁ ମାରି ।

ମୁଖମଣ୍ଡଳକୁ ଢାଙ୍କିଲାଣି କଳା

ଦେହରେ କଳା ଚାଦର

ବିମ୍ବିତ ହୁଏ ନାହିଁ ମୁଖ ଜଳରେ

ରକ୍ତାତ ହୁଏ ପୟର ।

ସବୁଜ ବନାନୀ ବିଲୁପ୍ତ ହେଲାଣି

ଏବେ କ୦କ୍ରିଟ୍ ଜଙ୍ଗଲ

ବାଘ ଭାଲୁ ହାତୀ ବାସହରା ହୋଇ

ନଷ୍ଟ କରିଲେ ଫସଲ ।

ପରିବର୍ତ୍ତନ ନାମେ ଧ୍ଵଂସ ଆଡକୁ

ଆଜି ମଣିଷର ଗତି

ଅମ୍ଳଜାନ ମାତ୍ରା କମି କମି ଯାଏ

ବଢଇ ବିନାଶ ଭୀତି ।

ମୌସୁମୀ ଆଉ ଆସୁନାହିଁ ସମୟେ

ବର୍ଷାକୁ ସାଥୀରେ ନେଇ

ଲଘୁଚାପ ବର୍ଷା ଅସ୍ତବ୍ୟସ୍ତ କରେ

ମାରେ କନ୍ଦେଇ କନ୍ଦେଇ ।

ତଥାପି କାହିଁକି ଚେତୁନି ମଣିଷ

ପ୍ରକୃତିର ରୂପ ଦେଖି

ଭବିଷ୍ୟତ ବିପନ୍ନ ହେଲାଣି ଜାଣି

ବିଚାର କରେ ପରଖି ।

ମାଗୁଛି ଧରଣୀ ସବୁଜ ଓଢଣୀ

ଚାଲ ଦେବାରେ ଘୋଡେଇ

ବିପଦ ଟଳିବ ବସୁଧା ହସିବ

ସୁନ୍ଦର ରୂପକୁ ପାଇ ।

ଲୋଡ଼ା ଏବେ ଏକ ସବୁଜ ବିପ୍ଳବ

ଗଛକୁ ଦେବା ଲଗାଇ

ସଭିଙ୍କ ସୁରକ୍ଷାରେ ଖୁସି ପାଇବା

ଜୀବନ ଆଣ ଫେରାଇ ।।।

.........ପଦ୍ମାଳୟା