વહોર્યો છે ગુલાલ
વહોર્યો છે ગુલાલ
ન જાણે કેવાં કરશે હાલ,
રંગરસિયાએ ફાંટ ભરીને વહોર્યો છે ગુલાલ !
ઊભી બજારે લોકે અચરજ આંખો ફાડી જોયું,
ચપટીભર સિંદૂરિયે મેં લાખેણું હૈયું ખોયું !
અંગઅંગ આજે રંગાશે , નસનસ દોડે વ્હાલ...
ન જાણે કેવાં કરશે હાલ,
રંગરસિયાએ ફાંટ ભરીને વહોર્યો છે ગુલાલ !
અખાત્રીજનાં આણું વળવા હું થઈ'તી તૈયાર,
વસંતપાંચમે આવી જિદ્દી લઈ ગયો જ ધરાર,
આ સહિયારી પૂનમ પર કરવા રંગીન ધમાલ !
ન જાણે કેવાં કરશે હાલ,
રંગરસિયાએ ફાંટ ભરીને વહોર્યો છે ગુલાલ !
રોમરોમ રંગાણી ત્યારે સમજાણી એ વાત ,
હોળી ફરતે ફેરા ફરતાં ઉઘડ્યું નવું પ્રભાત ,
એનું પગલું આજ છે મારી, પડછાયો છે કાલ !
ન જાણે કેવાં કરશે હાલ,
રંગરસિયાએ ફાંટ ભરીને વહોર્યો છે ગુલાલ !