ଯୁଗ ବଦଳି ଗଲାଣି

ଏ ଦୁନିଆ ଆଉ ବଡ ହୋଇ ନାହିଁ 

        ଆମରି ପାଇଁ, 

ଅସମ୍ଭବ ସବୁ ସମ୍ଭବ ହେଲାଣି 

        ଦେଖୁନା ଭାଇ |

ଜୀବନ ଜିଇଁବା ସତରେ ଗଲାଣି 

       ସହଜ ହୋଇ, 

ସାରା ଜଗତ କୁ ଦେଖୁଅଛୁ ଘରେ 

       ଟିଭି କୁ ଚାହିଁ |

ଇଣ୍ଟରନେଟ ରୁ କେତେକଥା ଆମେ 

       ପାରୁଛୁ ଜାଣି, 

କମ୍ପ୍ୟୁଟର କରେ ଯେଉଁ କାମ ଲାଗେ 

       ମଣିଷ ଠାଣି |

ବନ୍ଧୁ ପରିଜନ ଯିଏ ଯେତେ ଦୂରେ 

      ଥିଲେ ବି ରହି, 

ଘରେ କି ବାହାରେ ମୋବାଇଲ ଦିଏ 

      ଖବର କହି |

ଦୂର ଦେଶେ ବେଗେ ଉଡ଼ାଜାହାଜ ରେ 

      ଯାଉଛୁ ବସି, 

ନାନା ଖାଦ୍ୟତକ ଫ୍ରିଜ ରେ ରଖୁ 

      ରାନ୍ଧିକି ବେଶୀ |

ସେଥିପାଇଁ ନିତି ତରକାରୀ ରନ୍ଧା 

      ହେଉନି ଘରେ, 

ତଳେ ବସି ଖାଦ୍ୟ ନ ଖାଇ, ଖାଆନ୍ତି 

       ଡାଇନିଂ ରେ |

ଗ୍ରାଇଣ୍ଡର ଯୋଗେ କଟା, ବଟା ପେସା 

      ହେଉଛି ଛାଆଁ, 

ଶୀଳ ଶୀଳପୁଆ କେଉଁଠି ପଡିଛି 

      ଖୋଜେନି ମାଆ |

ଗରା ବାଲିଟି ରେ କୂଅରୁ ପାଣି କେ 

       କାଢ଼ିବ କେତେ, 

ପାଇପ ରେ ପାଣି ଭସ ଭସ ଆସେ 

        ଯାହାକୁ ଯେତେ |

ଗଛ କଟାହୋଇ କଳ କାରଖାନା 

        ବସି ଗଲାଣି , 

ଆଗପରି ଆଉ ଛୋଟଠାରୁ ବୁଢ଼ା 

     . ଭୋକେ ରହୁନି |

ପାଣି ଜମୁଥିବା ଗାଡ଼ିଆ ପୋଖରୀ 

      କୋଠା ହେଲାଣି, 

ପ୍ରତ୍ୟେକ ସହରେ ବୃଦ୍ଧାଶ୍ରମ କେନ୍ଦ୍ର 

       ଖୋଲି ଗଲାଣି |

ଗାଆଁ କି ସହର ଜଣା ପଡୁନାହିଁ

       ସବୁ ସୁବିଧା, 

ଯୁଗ ଟା ତ ପୁରା ବଦଳି ଗଲାଣି

       ନାହିଁ ରେ ବାଧା |

ଯୁଗ ସହ ତାଳ ଦେଇ କି ଚଳିବା

      ଆମରି କାମ, 

ଜାତିଭେଦ ଆସ ଦୁରେଇ ରଖିବା 

 .     ନିଜ ସୁନାମ |