ଯେସାକୁ ତେସା
ଯେସାକୁ ତେସା
ବିଜୁଳି ବିଭାଗ ବଡ଼ ଅଫିସର
ପଚାରେ କଦଳୀ ମୂଲ,
କଦଳୀ ବିକ୍ରେତା ସମ୍ଭ୍ରମରେ କହେ
କିପାଇଁ ନେବ କହିଲ ?
ଏମିତି କାହିଁକି ପଚାରୁଛ ବୋଲି
ଅଫିସରଙ୍କର ପ୍ରଶ୍ନ ,
କହେ ସେ ବେପାରୀ କିଆଁ ପଚାରିଲି
ବୁଝାଇ କହୁଛି ଶୁଣ ।
ମନ୍ଦିରକୁ ଦଶ ବୃଦ୍ଧାଶ୍ରମେ ବା'ର
ଘରକୁ ନେଲେ ପନ୍ଦର,
କହେ ସେ ଗ୍ରାହକ ଭିନ୍ନ ଦାମ କିଆଁ
କଦଳୀ ଏକ ପ୍ରକାର ?
ଉତ୍ତରରେ କହେ ଦୋକାନୀ ଜଣକ
ଏକ ଖୁଣ୍ଟୁ ଯୋଡ଼ି ତାର,
ବିଜୁଳି ଦେଉଛ, ଭିନ୍ନ ଭିନ୍ନ ମୂଲ୍ୟ
ଆସୁଛି କିମ୍ପା ବିଲର ?
ପଚାଶ ରିଡିଂରେ ଏକ ଦାମ ଲେଖ
ଶହେରେ ଅଲଗା ଦାମ,
ସେହି ରିଡିଂ ପୁଣି ଦୁଇଶ ଟପିଲେ
ଭିନ୍ନ ମୂଲ୍ୟ ହୁଏ ତୁମ ।
ଗ୍ରାହକ ମିଟର କିଣି ଲଗାଇଲେ
ପଡୁଛି ଏକ ହଜାର,
ତୁମେ ଯେତେବେଳେ ମିଟର ଦେଉଛ
କହୁନାହଁ ମୂଲ୍ୟ ତା'ର ?
ଜୀବନଟା ଯାକ ମାସ ପରେ ମାସ
କିସ୍ତିରେ ଦେଉଛୁ ଟଙ୍କା,
ତଥାପି ସେ ବାକି ସୁଝୁନାହିଁ ଆମ
ପକେଟ କରୁଛ ଫାଙ୍କା।