ତୁମେ ମୋ ଜୀବନ

ଆଖିରେ ଦେଖେ ମୁଁ ତୁମ ପ୍ରତିଛବି

   ଓଠରେ ପ୍ରୀତିର ହସ,

ହୃଦୟ ଭିତରେ ରଖିଛି ସାଇତି

   ତୁମେ ମୋ ଶେଷ ନିଃଶ୍ୱାସ ।

ପ୍ରେମ ବଗିଚାର ସଜଫୁଟା ଫୁଲ

   ତୁମ ଦେହେ ଦିଏ ଛୁଇଁ,

କାକର ବିନ୍ଦୁର ସୁନେଲି କିରଣ

   ଝଟକେ ତୁମରି ପାଇଁ ।

ଝରକା ଫାଙ୍କରୁ ତୁମ ପାଦ ଚିହ୍ନ

   ସହଜରେ ବାରି ହୁଏ,

ପାଉଁଜି ତୁମର ପ୍ରେମ ରାଗସୁରେ

   ମନ ମୋର କିଣି ନିଏ ।

କାନର କୁଣ୍ତଳ ସତେ କି'ମୋତେ 

  ହାତ ଠାରି ଡାକୁଥାଏ ?

ଓଠ ସିନା ତୁମ ମୁଦିତ ନିରବ

  ଆଖି କଥା କହୁଥାଏ ।

ପ୍ରେମର ସାଗରେ ମୋତିଟିଏ ତୁମେ

    ମୁଁ ତୁମ ଶାମୁକାଟିଏ,

ତୁମେ ହେଲେ ଛବି ମୁଁ ତୁମ ଛାଇ

    ତୁମେ ମୋ ଜୀବନ ଟିଏ ।

ଭଲ ମୁଁ ପାଉଛି ପାଉଥିବି ଭଲ

  ଜୀବନ ମୋ ଥିବାଯାଏ,

ସାଥି ହୋଇ ତୁମ ଚାଲୁଥିବି ବାଟ

    ତୁମରି ପାଦର ତାଳେ ।