ସରକାରୀ ବାବୁ

ପଢି ପାଠଶାଠ ପାଆନ୍ତି ନିଯୁକ୍ତି

ସରକାରୀ ବାବୁ ଜ୍ଞାନୀ

ଶିକ୍ଷକ ସେବକ ପିଅନ ଅର୍ଦ୍ଦଳୀ

ପଦ ହାକିମ କିରାଣୀ ।

ନିର୍ଘଣ୍ଟ ସମୟେ ଅଫିସ ଦପ୍ତରେ

ନୀୟମ ଅନୁପାଳନ

ଯୋଗାଇ ଦିଅନ୍ତି ସେବା ଯଥୋଚିତ

ଦେଇ ନିଜ ଉପସ୍ଥାନ ।

ଖଜୁରୀ ଗଛର ଗୁଣ ଅସରନ୍ତି

ମୂଳରୁ ପାହାଚ ପାହାଚ

ସରକାରୀ ବାବୁ ପଦବୀର ସ୍ତର

ରହିଥାଏ ଉଚ୍ଚ ନୀଚ୍ଚ ।

ସର୍ବେ ଅଧସ୍ତନ ଅତ୍ଯନ୍ତ ବିଶ୍ବସ୍ତ 

କରତବ୍ଯ ପରାୟଣ

ତଥ୍ଯ ସତ୍ଯାସତ୍ଯ ଅନୁସାରେ ନଥି

ହୁଅଇ ଚିଠାକରଣ ।

ଖୋଲେ ନାଲିଫିତା ପତ୍ର ନାମାଙ୍କନ 

ପ୍ରସ୍ତୁତି ଉତ୍ତର ଫର୍ଦ୍ଦ 

ହାକିମ ନିଷ୍କର୍ଷ ଦରଜ ହୋଇଲେ

ଆଦେଶ ହୁଏ ମୁଦ୍ରଣ ।

ସରକାରୀ କଳ କଲମର ଚାଷ

ନଥିପତ୍ର ସଂରକ୍ଷଣ

ବ୍ୟାପାରଟି ନୁହେଁ ସରଳ ପ୍ରକ୍ରିୟା

ସାଧାରଣ ବୋଧଗମ୍ୟ ।

ଶିକ୍ଷା ସ୍ବାସ୍ଥ୍ୟ ସେବା ନ୍ଯାୟ ପ୍ରଶାସନ 

ନିର୍ମାଣ ଖଣି ଖାଦାନ 

ବିଭିନ୍ନ ବିଭାଗେ ବ୍ଯାପକ ଦୁର୍ନୀତି

ଚାଲୁଛି ବାଟମାରଣ ।

ଦପ୍ତର ଦଉଡି ଛିଣ୍ଡି ଯାଏ ପଛେ

ଚପଲ ଜନତା ପାଦ

ହୁଏ ନାହିଁ କାମ ମିଳେ ନାହିଁ ନ୍ଯାୟ

ବଢେ ଲାଞ୍ଚ ତୋଷାମଦ ।

କମ୍ବଳରୁ ବାଳ ବାଛିବ କିଏ ସେ

ଗଣିବ ଚାଲୁଛି କଣା

କାହାର ରହିଛି ଉତ୍ତରଦାୟିତ୍ଵ

ନିର୍ଦ୍ଧାରଣେ ବୁଦ୍ଧିବଣା ।

ଛାଡଇ ଦୁର୍ଗନ୍ଧ କତରା ବିଛଣା

ମୁତୁରୀ ମୁତୁରା ଏକ

ଚିହ୍ନଟକରଣ ଦୂରୁହ ବ୍ଯାପାର 

ମୁରୁଖ ବିଚରା ଲୋକ ।

ଦେଖାନ୍ତି ଆଲୁଅ କିଛି ବାବୁଗିରି

କରାମତି ଠାଣିମାଣି

ଚିକ୍କଣ କରନ୍ତି ଆପଣା ହାତକୁ

ମାରି ଭଲ ପୁଞ୍ଜି ପଣି ।

ମିଛ ଗାଲୁଆମି ଫନ୍ଦି ଓ ଫିକର

ଦେଖାଇ ମୁହଁ ଭୁରୁଡି

ନାଲି ଆଖି କାଢି କିଛି ବଡ଼ବାବୁ

କରିଥାନ୍ତି ଜାଲିଆତି ।

ନିଜ ସ୍ବାର୍ଥ ପାଇଁ ଭୁଲି ହିତାହିତ 

ଅବହେଳା ଜନସ୍ବାର୍ଥ 

ଜନ ସାଧାରଣ ବୃହତ୍ତର ହିତ 

କରଇ ନଷ୍ଟ ବାଧିତ ।

ଭ୍ରଷ୍ଟାଚାର ଗ୍ରସ୍ତ ସରକାରୀ ବାବୁ

ବିକାଶର ବଡ ଶତ୍ରୁ

କଠିନ ଦଣ୍ଡର ରହିଲେ ବିଧାନ

ଯୋଜନା ସ୍ବଚ୍ଛ ସୁଚାରୁ ।