ସଂପର୍କ
ସଂପର୍କ
ସଂପର୍କ !
ବୁଢ଼ୀଆଣି ଜାଲ ନୁହଁ
ଆଙ୍ଗୁଳି ବାଜିଲେ ଛିଣ୍ଡି ଯିବ ,
ବେଳାଭୂମି ର ବାଲିଘର ନୁହଁ
ଢେଉ ଆସି ଭାଙ୍ଗି ଦବ ,
ମାଟିର କଣ୍ଢେଇ ନୁହଁ
ଖେଳୁଖେଳୁ ହାତରୁ ପଡ଼ି ଭାଙ୍ଗି ଯିବ ,
ସଂପର୍କ ର ଗୋଟେ କାଚ଼ର ଆଇନା
ଭାଙ୍ଗିଗଲେ ବି ପ୍ରତିଟି ଖଣ୍ଡରୁ
ପ୍ରତିବିମ୍ବିତ ହେବ ପ୍ରତିଛବି ।
ଆକାର ଅସମାନ, ଛବି ସମାନ ,
ସଂପର୍କ ତ ଦୁଇଟି ବାୟୁ ଶୂନ୍ୟ
ଅର୍ଦ୍ଧ-ଗୋଲକ ର ଆଲିଙ୍ଗନ ।
ସଂପର୍କ !
ଗଙ୍ଗଶିଉଳି ନୁହଁ
ରାତିରେ ଫୁଟି ଝଡ଼ିଯିବ ,
କାଗଜ ଡଙ୍ଗା ନୁହଁ
ଶ୍ରାବଣ ର ବାରିଧାରା ରେ ଭାସିଯିବ,
ସିଲଟ ରେ ଲେଖା -
କେଇଟା ଅକ୍ଷର ନୁହଁ
ହା କରିଦେଲେ ଲିଭିଯିବ ,
ଉଇ ଚ଼ରା ଘର ର ମଝିଖୁଣ୍ଟ ନୁହଁ
ଉଇ ଝଡ଼ି ଗଲେ ଖସିପଡ଼ିବ ମଥାନ ,
ବେଲୁନ୍ ବାଲା ର
ରଙ୍ଗ ବେରଙ୍ଗୀ ବେଲୁନ୍ ନୁହଁ
ନିମିଷକେ ସବୁ ଶେଷ
ବାଜିଗଲେ ଛୁଞ୍ଚି ମୂନ ,
ତାସ୍ ର ଘର ନୁହଁ
ଭାଙ୍ଗିବାକୁ ଲୋଡ଼ା ହୁଏ
ଏକ ଆନମନା , ଦଲକାଏ ପବନ ।
ସଂପର୍କ ତ
ଦୁଇଟି ଅନାବୃତ ଆବେଗ ର
ସଂବେଦନ ,
ଦୁଇଟି ସମାନ୍ତରାଳ ସରଳ ରେଖା
ଯେଉଁଠି ଆକାଶ
ପୃଥିବୀ କୁ ଦେଇଥାଏ ଚୁମ୍ବନ ।
ସଂପର୍କ ତ
କାୟା ଆଉ ମାୟା ମଝିରେ
ଏକ ଦୀର୍ଘଶ୍ବାସ ,
ଥରେ ଗଢ଼ି ଉଠିଲେ
ପାଲଟିଯାଏ କିମ୍ବଦନ୍ତି
ଯାହାର ମୂକ-ସାକ୍ଷୀ ଇତିହାସ ।