ସବୁଠୁ ଭଲ ମୋ ମା' ଓଠ ଭାଷା
ସବୁଠୁ ଭଲ ମୋ ମା' ଓଠ ଭାଷା
ସବୁଠୁ ଭଲ ମୋ ମାଆ ଓଠ ଭାଷା
ଲାଗଇ ମଧୁଠୁ ମିଠା ଯେମିତି
ବୋଲଇ ତାହାକୁ ମୋର ମାତୃଭାଷା
ଓଡ଼ିଆ ନାମରେ ଜଗତେ ଖ୍ୟାତି ।
ଅଶେଷ ଭାଷାର ସମ୍ମିଶ୍ରଣରେ
କଳେବର ପରା ବୃଦ୍ଧି ତାହାରି
ସଭିଏଁ ଏକଥା ଜାଣିଛୁ ମାତର
ମୂଳ ଭାଷା ତା'ର ଦେବନାଗରୀ ।
ଦିନେ କୁଚକ୍ରୀଙ୍କ ଚକ୍ରବ୍ୟୁହରେ
ଫସି ବିଲୀନର ସମ୍ଭାବନା
ଆଣଲେ ଉଦ୍ଧାରି ଯେଉଁ ମହାରଥୀ
ସେମାନଙ୍କ ପଦ କରେ ବନ୍ଦନା ।
କରଇ ମୁଖରେ ଯାହା ଉଚ୍ଚାରଣ
ଲିଖନରେ ଅବିକଳ ପ୍ରକାଶ
ଏମିତି ଭାଷା ତ ଜଗତେ ବିରଳ
ବୁଣଇ ଓଡ଼ିଆ ପ୍ରାଣେ ହରଷ ।
ଏଗାରଟି ସ୍ବର ଛତିଶ ବ୍ୟଞ୍ଜନ
ପାଞ୍ଚ ଅତିରିକ୍ତ ବର୍ଣ୍ଣକୁ ଧରି
ହୋଇଛି ସମୃଦ୍ଧ ତା'ର ଭାଷାକୋଷ
ଜ୍ଞାନ ଗାରିମାକୁ ବୁକୁରେ ଭରି ।
ଯେବେ ଚୁମି ଦେଲା ମୋହର ଓଠକୁ
ମୋ ମାଆ ମୁଖରୁ ତା' ପରିଭାଷା
ଗୁଲୁଗୁଲୁ ଓଠେ ସତେ କି ମଧୁର
ଦେଖାଇ ଚାଲିଲା ଆଗକୁ ଦିଶା ।
ମାଆ ବନ୍ଦନୀୟା ଭାଷା ବନ୍ଦନୀୟା
ଦୁଇ ଜନନୀଙ୍କୁ କୋଟି ପ୍ରଣତି
ଆଶିଷର ହାତ ଥାଉ ମୋ ମଥାରେ
ରଚିବି ତା' ନାମେ ଅଖଣ୍ଡ କୀର୍ତ୍ତି ।
ଆନ୍ତର୍ଜାତିକ ମାତୃଭାଷା ଦିବସେ
ହୃଦୟ ଭିତରୁ ନିଏ ଶପଥ
ତାହାର ମହିମା ଆମର ଗାରିମା
ଏହି ମତିରେ ମୁଁ ଚାଲିବି ପଥ ।