ରଜ ପୋଡ଼ପିଠା

ଅଶି ବରଷରେ ବୁଢ଼ା ଆମ ଗାଁ ଦୁରୁଯା

ବୁଲି,ଦୁଲି ବୋଲି ତାର ଦୁଇଟି ଭାରିଯା l

ବୁଢ଼ା ସ୍ୱର୍ଗବାସୀ ହେଲା ସନ୍ନିପାତ ଜ୍ବରେ

ଦୁଇ ସପତଣୀ କାଳ କାଟିଲେ କଷ୍ଟରେ l

ପର ଘରେ ପାଇଟିକୁ ଢେଂକି ଧାନ କୁଟି

ଦୁଃଖକଷ୍ଟେ ଦିନ ତାଙ୍କ ଯାଉଥିଲା କଟି l

କାଳ ଆବର୍ତ୍ତନେ ରଜ ପରବ ଆସିଲା

ବଡ଼ ବୁଲି ଡାକି,ସାନ ଦୁଲିକୁ କହିଲା l

ଏଥର ରଜକୁ ଚାଲ କରି ପୋଡ଼ପିଠା

ମଜାରେ ଭୁଞ୍ଜିବା ଟିକେ ମୁହଁକରି ମିଠା l

ଏମନ୍ତେ ଯୋଗାଡ଼ି ଗୁଡ଼ ନଡ଼ିଆ ଚାଉଳ

ବନସ୍ତକୁ ଗଲେ ଭାଙ୍ଗି ଆଣିବାକୁ ଜାଳ l

ବନସ୍ତରେ ରାଜା ବାଘ ଅଟେ ମହାବଳ

ଲାଞ୍ଜପିଟି ପହଞ୍ଚିଲା ଶୁଣି ତାଙ୍କ ଗୋଳ l

କିଏ ରେ ଦୁର୍ମତି ତୋର ଏତିକି ତାକତ

ବେକ କଣା କରି ତୋର ପିଇବି ରକତ l

ବୁଲି,ଦୁଲି ବାଘ ଦେଖି ମହାଭୟ କଲେ

କାକୁତି ମିନତି ହୋଇ ବାଘକୁ କହିଲେ l

ବାଘମାମୁଁ ଜଙ୍ଗଲରୁ ଜାଳ ଆମ୍ଭେ ନେବୁ

ରଜ ପୋଡ଼ ପିଠାଟିଏ ଯତନେ ଗଢ଼ିବୁ l

ଆମ୍ଭ ଘରକୁ ଆସିବେ ଖାଇଯିବେ ପିଠା

ଆଜି ରାତିରେ ଆମ୍ଭର ରହିଲା ନିମତା l

ବୁଲି ଦୁଲି ଜାଳନେଇ ଘରକୁ ଫେରିଲେ

ପୋଡ଼ପିଠାଟିଏ କରି ମଜାରେ ଖାଇଲେ l

ବାଘମାମୁଁ ପାଇଁ କଲେ ମସ୍ତ ବଡ଼ ପିଠା

ତହିଁ ପକାଇଲେ ଗୋଡ଼ି,ଖପରା ଓ କଣ୍ଟା l

ପିଇବାକୁ ରଖି ଦେଲେ ଲଙ୍କାବଟା ପାଣି

ବାଘଟା ପାଇବ ପାନେ ମନେମନେ ଗୁଣି l

ଯତ୍ନେ ରଖି ଏରୁଣ୍ଡିରେ ବାଘ ମାମୁଁ ପାଇଁ

ନିଦଗଲେ ଯାଇ ଘରେ ନନ୍ଦା ଉଗୁଡ଼େଇ l

ପୋଡ଼ ପିଠା ଖିଆ ନିଶା ବାଘକୁ ଲାଗିଛି

ଅର୍ଦ୍ଧ ଯାମେ ପହଞ୍ଚିଲା ତାଙ୍କ ଘରେ ଆସି l

ବାଘ ଶବ୍ଦ ଶୁଣି, ବୁଲି, ଦୁଲି ଡରି ଗଲେ

ମାମୁଁ ଶୁଣ ବାଘକୁ ସେ ଡାକିକି କହିଲେ l

ଏରୁଣ୍ଡିରେ ପିଠା, ପାଣି ଅଛି ଦେଖି ନିଅ

ହରଷରେ ଖାଇ ମାମୁଁ ବନେ ଫେରିଯାଅ l

ବାଘ ତହୁଁ ହରଷରେ ପିଠା ଚୋବାଇଲା

ଗୋଡ଼ିଟିଏ ଲାଗି ତାର ଦାନ୍ତ ଭାଙ୍ଗିଗଲା l

ବିକଳହୋଇ ସେ ଯହୁଁ ପିଏ ଟିକେ ପାଣି

ଲଙ୍କା ରାଗରେ ଜଳିଲା ତାହାର ଥୋମଣି l

ବୁଲି ପେଟ ପିଠା ଖାଇ ଗଣ୍ଡଗୋଳ ଥିଲା

ଢ଼ୋ କିନା ଆବାଜରେ ଉହ୍ମେଇଁ ଫାଟିଲା l

ଲାଙ୍ଗୁଡ଼ ଉଠେଇ ବାଘ ବନେ ଦଉଡ଼ିଲା

କଥା ଏତିକି କେତକୀ ଫୁଲଗଛ ମଲା l