ପ୍ରକୃତିର ଅଗ୍ରାଧିକାର

ମନୁଷ୍ୟର ସୃଜନର ରୂପ ହେଲେ ନାନାପ୍ରକାର,

ସ୍ୱୟଂକୁ ଅନୁଭୂତ କରିଲା ସର୍ବଶ୍ରେଷ୍ଠ କଳାକାର,

ଅଗ୍ରଗତି କରିଲା ଦିନକୁଦିନ ଯାହାର ଅହଙ୍କାର,

ବିଭିନ୍ନ ବନ୍ୟ ପ୍ରାଣୀଙ୍କ ପ୍ରତି କରିଲା ଅତ୍ୟାଚାର |୧|

ଅନବରତ କରି ଚାଲିଲା ନୂତନ ଉଦ୍ଭାବନ ଆବିଷ୍କାର,

ନିସର୍ଗର ମହାର୍ହ ଉପକାରର କରିଲାନି ପ୍ରତ୍ୟୁପକାର,

ବିଜ୍ଞାନର ବ୍ୟବହାର ଦ୍ୱାରା ସର୍ଜନା କରିଲା ଚମତ୍କାର,

ଉତ୍ପୀଡ଼ିତ ପ୍ରଦୂଷିତ ପର୍ଯ୍ୟାବରଣର ଶୁଣିଲାନି ଚିତ୍କାର |୨|

ସମଗ୍ର ସଂସାଧନ ହେଲେ ବେକାର,

ସଙ୍କ୍ରାମକ ମଡ଼କର ହେଲା ବିସ୍ତାର,

ନିଜ ବୁଦ୍ଧିହୀନତାର ହେଲା ଶିକାର,

ନିଜେ ଭାବିଲା ମହିର ଚାରୁ ଚିତ୍ରକାର |୩|

ବସୁଧାରେ ବ୍ୟାପକ ହେଲା ହାହାକାର,

ପୃଥିବୀ ପ୍ରତ୍ୟୁତ୍ତରରେ ଦେଲେ ହୁଙ୍କାର,

ମାନବର ଆକ୍ରମଣ ଶକ୍ତି ହେଲା ବିକାର,

ପ୍ରକୃତି ଜ୍ଞାତ କରାଇଲା ନିଜ ଅଗ୍ରାଧିକାର |୪|