ପ୍ରିୟା ଓଢଣୀ

ସୂର୍ଯ୍ୟକୁ ନେହୁରା ହେଲି 

          କରିବନି ଖରା,

କଳା ପଡ଼ି ଯିବ ପ୍ରିୟା

     ତୋଫା ଗୋରା ଗୋରା ।

ରାଗ ଲାଗେ ପବନକୁ

        ବଡ଼ ବେଇମାନି,

ଟାଣି ଦିଏ ଜାଣି ଶୁଣି

         ପ୍ରିୟା ଓଢଣୀ ।

ବରଷାର ହାତ ଧରି

         କଲି ଗୁହାରୀ,

ଆସନା ଆସନା ଝଡ଼

        ସାଥିରେ ଧରି 

        ପ୍ରିୟା ଯାଉଛି ଡରି ।

ମଜା ଲାଗେ ଝିପିଝିପି ବରଷା ପାଣି

ନାଚିବ ମୋ ପ୍ରିୟା ତାର ଟାଣି ଓଢଣି ।

ଶରତେ ଆରତ କରି ରଖିଛି କଥା

ଶିଶିର ଆଣିବ ପ୍ରିୟା କରିବ ମୁକ୍ତା

    ଲାଗିବ ଶିଶିର ଟୋପା ହୀରା ବସେଣି

    ଝଲମଲ ଦିଶିବ ମୋ ପ୍ରିୟା ଓଢଣୀ ।

ଶୀତକୁ କରିଛି ମିତ

     ମାଘେ ନଆସେ,

ଓଢଣୀ ଘୋଡ଼ଣି କରି

     ପ୍ରିୟା ମୋ ହସେ ।

କଅଁଳ ଖରାକୁ କହି କଅଁଳ କଥା

କହିବ ପ୍ରିୟାରେ ଯାଇ ମିଠା ବାରତା

 ଶୀତ ଗଲେ ଫଗୁଣରେ ହେବ ଘରଣୀ

 ଏବେଠୁ ଅଭ୍ୟାସ କରୁ ଟାଣି ଓଢଣୀ ।

ଫଗୁଣେ ଦେଇଛି ରାଣ

         ଆଣିବ ଧରି ,

ଫଗୁ ବୋଳା ରଂଗ ସାଥେ

        ପିଚ଼କାରୀ ।

ରଂଗରେ ଗାଧେଇ ପ୍ରିୟା

      ହେବ ରଂଗିନୀ ,

ମୁହଁ ଲୁଚେଇବ ପ୍ରିୟା ଧରି ଓଢଣୀ ।

ଚଇତେ ଚରିତ୍ର ଦୋଷ ପାରିଛି ଜାଣି ,

ପ୍ରିୟାକୁ କହିଛି ଯିବ ଓଢଣା ଟାଣି ।

    ଜହ୍ନ ରେ ମିଳିଛି ତତେ ମେଘର କାନି

   ମୋତେ ତ ମିଳିଛି ମୋର ପ୍ରିୟା ଓଢଣୀ ।