ଫୁଲଟିଏ ମୋତେ କରିଦେ କାଳିଆ

ଫୁଲଟିଏ ମୋତେ କରିଦେ କାଳିଆ

ହାରଟିଏ ହୋଇ ଝୁଲନ୍ତି

ପାଦତଳେ ଲୋଟି ପଡନ୍ତି

ପୁଷ୍ପାଞ୍ଜଳି ବେଳେ

ପାପୁଲି ମଝିରେ ଚାପି ରହିକରି

ଫୁସ ଫୁସ ଦୁଃଖ ଗୁହାରି ଶୁଣାନ୍ତି ।

ସଳିତା ମୋତେ ତୁ କରିଦେ କାଳିଆ

ଦୀପରେ ମୁଁ ଲାଖି ଯାଆନ୍ତି

ଘିଅ-ତେଲରେ ବୁଡି ପଡନ୍ତି

ଆଳତି ବେଳରେ

ଦାଉ ଦାଉ ହୋଇ

ମାୟା ଅନ୍ଧାରକୁ ଶେଷ କରନ୍ତି ।

ଅବଢା ମୋତେ ତୁ କରିଦେ କାଳିଆ

ଆନନ୍ଦ ବଜାରେ ମୁଁ ବିକୁଥାନ୍ତି

କଦଳୀ ପତ୍ରରେ ମୁଁ ବଢା ହୁଅନ୍ତି 

ଭକତଙ୍କ ପାଇଁ

କୁଣ୍ଡି କୁଣ୍ଡି ହୋଇ

ପେଟର କ୍ଷୁଧାକୁ ସାରି-ମାରି ଦିଅନ୍ତି ।

ବଡଦାଣ୍ଡ ଧୂଳି ମୋତେ କରିଦେ କାଳିଆ

କପାଳରେ ଶୋଭା ପାଆନ୍ତି

ଅଙ୍ଗୁଳି ଟିପରେ ଲାଗୁ ଥାଆନ୍ତି

ଜକ ଜକ ହୋଇ

ଦାଉ ଦାଉ ହୋଇ

ଖଳ ଜନର କୁ-ଦୃଷ୍ଟିକୁ ହଟେଇ ଦିଅନ୍ତି ।

ଟଙ୍କ ତୋରାଣି ମୋତେ ତୁ କରିଦେ କାଳିଆ

ବାସି ହୋଇ ବାସୁ ଥାଆନ୍ତି

ତୃଷ୍ଣାକୁ ମେଣ୍ଟାଉ ଥାଆନ୍ତି

ପାଣିର ଆଳରେ

ଭକତଙ୍କ ପାଇଁ

ତୃପ୍ତିର ହାକୁଟି ସଦା ଆଣି ଆସନ୍ତି ।