ଫେସ୍ ବୁକ୍ ଫେକ୍ ବୁକ୍
ଫେସ୍ ବୁକ୍ ଫେକ୍ ବୁକ୍
ଫେସ୍ ବୁକ୍ ନୁହେଁ ଫେକ୍ ବୁକ୍ ବୋଲି
ବହୁତ କୁହନ୍ତି ଶୁଣିଛି ମୁହିଁ ,
ହୃଦବୋଧ କଲେ ନିଶ୍ଚୟ ଜାଣିବ
କିଛିକାଂଶେ ପ୍ରାୟ ସତ'ତ ଏହି ।
ଭାବ ଭାବନାର ସ୍ଥାନ ନାହିଁ ଏଠି
ଏଠି ନାହିଁ କାହା ଆନ୍ତରିକତା ,
ସାଙ୍ଗ, ସାଥୀ ଏଠି ମିଳନ୍ତି ହଜାର
ଏହା'ହିଁ ମୁଖପତ୍ର ବିଶେଷତା ।
ଅନ୍ତର ଗୋଟିଏ ବାହାର ଗୋଟିଏ
ମୁଖ ବୋଳା ମଧୁ କେତେ ଯେ ମିଠା ,
ଅଳ୍ପ ଓ ବହୁତେ ସର୍ବେ ଅନୁଭବି
ସତ ଅବା ମିଛ କୁହ ଏ' କଥା ?
ପାନରୁ'ତ ଚୂନ ଖସିଗଲେ ଏଠି
ବନ୍ଧୁତ୍ୱକୁ କାଟି କରନ୍ତି ସଫା ,
ମାୟା ଛଡା ଇଏ ନୁହେଁ କିଛି ଆଉ
ନୁହେଁ ଏଠି କେହି କାହାର ସଖା ।
ଏଠି ସମ୍ପର୍କରେ ମାଆ ,ପୁଅ ମିଳେ
ବନ୍ଧୁ,ବାନ୍ଧବୀ କେତେ ଲେଖା ଯୋଖା ,
ଭାଇ, ଭଉଣୀଙ୍କ ଲମ୍ବା ଲାଇନରେ
ପ୍ରେମିକ, ପ୍ରେମିକା ମିଳନ୍ତି ଚୋଖା ।
ପତି ଏଠି ଭୁଆଁ ବୁଲାଏ ପତ୍ନୀକୁ
ପ୍ରେମିକାକୁ କହେ ଭଉଣୀ ଲେଖା ,
ପତ୍ନୀବି ପତିଠୁଁ ଆର ସିଆଣିଆ
ମୁଖପତ୍ର ପରା ବନାଏ ବୋକା ।
ସଚ୍ଚା ସମ୍ପର୍କଟେ ଆଶା କରିବାଟା
ମରୀଚିକା ମୃଗତୃଷ୍ଣାର ପରି ,
ଫେସ୍ ବୁକ୍ ନୁହେଁ ଫେକ୍ ବୁକ୍ ଏ'ତ
ସଚ୍ଚା ସମ୍ପର୍କଟେ ଅଛି କାହାରି ?
ନୁହେଁ'ତ ତୁମର ନୁହଇଁ'ତ ମୋର
ଫେସ୍ ବୁକ୍ ଅଟେ ପୁରା ବେକାର ,
ଗୁରୁ , ଗୁରୁଜନେ ଦୋଷ ନ'ଧରିବ
ଫେସ୍ ବୁକ୍ ରିସ୍ତା ଦୂରୁ ଜୁହାର ।